No.1406/2021-2022

Lawngtlai, Vawkhniahzawn thla ni 15, 2021: Vawiin khan Lawngtlai Bawrhsap Dr Andrew H. Vanlaldika chuan a pisaah Mizoram Journalists' Association (MJA), Lawngtlai District member-te kawmin, COVID-19 hri leng kara chanchin thar puanzar kawngah sawrkar leh chanchinbu mite'n thawh hona tha zawk an neih theih dan tur a sawipui.

Lawngtlai Bawrhsap chuan sawrkarin COVID-19 kaihhnawih thu thar puanzar turte tualchhung chanchinbu mite'n an hriat zung zung theih nana ruahmanna siam tha a tih thu tar langin, tuna Lawngtlaia chanchinbu mite leh sawrkar thawh hona tha tak awm sa chu chhawm nung a, infinchhuah tawn tur leh pheikhai rual taka hma lakpui zel turin chanchinbu mite chu a sawm a ni.

Bawrhsap chuan COVID-19 hri leng dona kawnga District chhunga hma lakna kalpui mek dan leh hri leng chungchanga District dinhmun a tar lang a. Hri leng dona kawnga Lawngtlai District-a chanchinbu mite tha thawh chu chhuanawm a tih thu sawiin, anni bakah, sawrkar department hrang hrang leh Lai Autonomous District Council te, Central YLA, tlawmngai pawl hrang hrang, kohhran, VC leh mipuite thawhpuina tha tak avangin lawm thu a sawi a. Hri leng laka him nana inkaihhruaina leh dan zamte chu tha taka zawm zel turin District mipuite chu a chah nghal a ni.

He hunah hian hri leng dona kawnga District-a hma lakna kalpui mek dan thlir ho niin, kalphung tha nia hriatte sawi ho a ni a. Lawngtlai chanchinbu mite chuan hri leng kaihhnawih thu thar lak khawm kawnga harsatna an tawh thinte sawiin, Bawrhsap chuan chin felpui dan a lo ngaihtuah tur thu a sawi a ni.

Vawiina inkawm honaah hian Lawngtlai Bawrhsap hi Additional DC Pi Marilyn Rualzakhumthangi, SDO (Sadar) Pi TT Beikhaizi, SDC Pu H. Vanlalbiakzauva leh District Information & Public Relations Officer Pu C. Lalhruaitluanga te'n an tawiawm a ni.