601/2022-2023
Pu Kulothungan A, IAS, Deputy Commissioner, Lunglei District chuan 23rd May, 2022 khan a hnuai ami ang hian hriattirna a chhuah.

Fur hun a lo thleng leh ta a, chhiatna hrang hrang tuilian, leimin, lei tawlh, lei tlahniam, lungrem chim, chenna in chim leh a dangte thleng thei reng a ni a. Heng chhiatna lo thleng thin thenkhat hi chu a hun taka fimkhurna leh invenlawkna lam hna lo thawh chuan pumpelh theih a ni thin. Hetiang chhiatna thleng thei lakah hian Lunglei District mipuite, VC te leh Village Disaster Management Committee te theih tawpa inveng turin leh mahni in leh a chhehvel, mahni khua leh kawngpuite uluk lehzual a veng him turin kan in chah a ni.

Chhiat tawhna a thlen a hriattur pawimawh thenkhat te a hnuaiah hian tarlan a ni e:
1. Chhiatna engpawh a thlenin mahni bialtu Zonal Officer/Incident Commander te hriattir nghal vat tur a ni a, an thu ngaichangin a tul anga hmalak zui tur a ni. Lunglei Town Area a chhiatna thleng chu a thlen ni (Date of Incident ) atanga kar khat chhungin ziakin Deputy Commissioner Office-ah thlalak nen thehluh tur a ni a. Lunglei Town area pawn lam chu a thlen ni atanga thlakhat ral hmain thlalak nen theh luh tur a ni.

2. Rikrum thilah ziaka report thlen hman loh chang a tam a, chutiang a nih pawhin chhiatna a thlen veleh a thlen hun ni leh darkar chhinchhiah nghal a, thlalak fel fai tak neih tur a ni a. Rem chang hmasa berah ziakin thlalak nen report hi theh luh tur a ni. Thenfai/senghawi hna kan thawk a nih pawhin thenfai hma leh thenfai hnu thlalak felfai tak kan nei tur a ni a, khawl leh mihring tha kan chhawr a nih pawhin report ah tarlan tur a ni.

3. Kawngpui ah lei min emaw chhiatna dang a thlenin a bialtu PWD Officer emaw a enkawltu Company (ABCI, BIPL etc)te hriattir nghal vat tur a ni.

4. Zonal Officer/Incident Commander te hriatpuina ni lova mahni thua lei min thenfai hna leh hna dang lo thawh a, a hnua bill submit leh te chu pawm a ni lo ang.

5. Tul bik avanga debris clearance (leimin paih fai) hnathawh ngai a awm chuan Incident Commander te hriatpuina in chumi atan bik report-na tur proforma duan a ni a; he form hmang lo a dilna/report lutte chu pawm a ni lo ang.

6. Mimal hnen atanga harsatna emaw chhiatna thleng report ah reng reng VC te hriatpuina felfai tak a tel ngei tur a ni.

7. Silpauline dilna ah reng reng an mamawh chhan chiang taka ziakin, thlalak a tel tur a ni a, VC hriatpuina a tel ngei tur a ni.

8. Chhanchhuahna hnathawh ngai a awmin (lei min avanga in chim etc) Incident Commander te bak ah Police leh Health Department to a rang thei ang bera hriattir nghal tur a ni.