602/2022-2023
Kolasib dated 24th May 2022: Vawiin khan DC Conference Hall, Kolasib ah District Level SEDP Committee chuan thutkhawmna an nei a. Pu John LT Sanga, Deputy Commissioner chuan hun kaihruaiin ni 30, May 2022 ral hmaa Village Level SEPD Committee-ten SEDP hnuai a hmathatna dawng thei tur hming thehluh a tul thu sawi a ni.

Pu John LT Sanga, Deputy Commissioner chuan kuthnathawktute chawikanna tur a Sawrkar Flagship programme hlawhtling tak a kalpui a nih theih nan Kolasib district chhung a department leh khawtlang hruaitu member-a ruat te chu thawhhona tha tak hnuai a hmalak a tul thu a sawi a. Mi taima, dinchhuah tum a hma la tak tak turte tan SEDP chu hlawhtlinna kailawn tangkai a nih ngei theih nan Trade an thlan dan azirin Department hotute chuan an vilpui reng a pawimawh tur thu a sawi bawk a ni.

He hunah hian Pi Lalruatpui Hnamte, SDC, SEDP Nodal Officer, Kolasib district chuan ‘SEDP – Family Oriented Programme’ kalpui tur a inkaihhruaina hrang hrang tarlanna hun hmangin dilna Form 12 awmte hman dan tur sawi zauna hun a hmang bawk a ni.

Kolasib district-ah hian 4-Tuirial, 5-Kolasib leh 6-Serlui (ST) Assembly Constituency-te awmin heng atang hian Village Level SEDP Committee kaltlangin chhungkaw 1500 theuh thlan chhuah tur a ni a. State leh Central Government hnuai a hnathawk nghet awmna chhungkua a huam dawn lo a, SEDP hnuaia a nihna tur anga hma la tha lo te chu hamthatna pek chhunzawm an ni dawn lo a ni. SEDP hnuai a hmalaknate sawt zawk a kalpui a nih theih nan ni 25, May 2022 hian Parish Hall, Venglai, Kolasibah Village Level SEDP Committee member-te chu training pek an ni dawn bawk a ni.

Attachment

  • Loading attachment...