603/2022-2023
Aizawl, 24th May, 2022 : Health Minister Dr R. Lalthangliana chuan vawiin khan Civil Hospital, Aizawlah CT Scan khawl thar leh 500 LPM Oxygen Plant thar a hawng a, Minister hi H&FW Board Vice-Chairman Dr ZR Thiamsanga, MLA, Health secretary Pu R. Lalramnghaka leh Health Officials ten an tawiawm a ni.

Vawiina hawn tak CT Scan khawl thar hi Rs. 2,37,42,600/- man niin, 64 slice CT Scan Machine (Model: SOMATOM go.Up) a ni a, Siemens Healthcare Ltd., Germany te supply leh install a ni. A leina sum hi "Strengthening of Health Infrastructure for Comprehensive Response to Possible Outbreak of Covid-19 in Mizoram" Project hnuaia Ministry of DoNER atanga hmuh a ni.

Oxygen Generating Plant ve thung hi chu Ministry of DoNER hnuaia North East Special Infrastructure Development Scheme (NESIDS) Project "Strengthening of Health Infrastructure for Comprehensive Response to Possible Outbreak of Covid-19 in Mizoram" kaltlanga bun a ni a, 500 LPM (litres per minute) niin, hemi atan hian Rs. 110,00,000/- hmuh a ni.

Doctors’ Seminar Room, CHA a hawnna inkhawm buatsaihah Health Minister Dr R. Lalthangliana chuan Civil Hospital, Aizawlin hmasawnna duhawm tak a nei chu lawmawm a tih thu a sawi a, CT Scan khawl thar bun chungchangah technical thil eng eng emaw buaipui ngai a tam avangin duh angin hma kan la chak thei lova, mipuite pawhin kan nghakhlel tih kan hria a, chutih ruala dawhthei taka hriatthiamna nena min nghah avangin lawmthu ka sawi a ni, a ti a. Media ten tha taka an thawhpui avangin lawmthu a sawi bawk a ni.

Oxygen Plant thar bun tura hmalakna kawnga tha thawhtute zawng zawng chungah lawmthu sawiin, Civil Hospital, Aizawl chu damlote pan ber a nih avangin a kum telin pantu an pung a, Oxygen Plant kan mamawh belh tih hriain theihtawp kan chhuah a, 500 LPM hi chuan tun dinhmuna kan mamawh ang zat min phuhru thei turin kan ngai a, a tul huna thla vengah 200 LPM kan neihsa hi kan ring thei dawn bawk a ni, a ti a. Damloten an khum atanga awlsam taka oxygen an hip theihnan oxygen pipeline pawh tihchangtlun zel tum a ni, a ti bawk.

Health Minister chuan Civil Hospital, Aizawlah ICU 10 dang dah belh leh thuai tura hmalak mek a nih thu a sawi a, Cardiology Department tihchangtlunna tur cheng vaibelchhe 12.43 hmuh a nih tur thute, Boeing Company kaltlanga PHC leh CHC zawng zawngah portable x-ray leh ECG khawl dah tum a nih thute, PHC/CHC/Sub-Centre awm lohna khuaah te pawh mihring cheng zat azirin SEDP Health Clinic dan tum a nih thute a sawi bawk a ni.

Health & Family Welfare Board Vice-Chairman Dr ZR Thiamsanga pawhin Civil Hospital, Aizawla CT Scan khawl thar leh PSA Oxygen Plant thar hawn a n ih avanga a lawmthu sawiin Health department a thawkte inpeknaah lawm thu a sawi a, Civil Hospital, Aizawl chu damlo zingah pawh miharsa leh rethei zawkte pan ber a nih avangin heng khawl tharte hian nasa takin an harsatna a chhawk zangkhai ngei a rin thu a sawi a ni.

Civil Hospital, Aizawlah hian a hmasa ber atan September ni 12, 2003 khan C.T Scan Machine 16 Slices, Siemens Healthcare Ltd. siam Rs. 2.00 crore man bun a ni a, a sum hi NABARD atanga hmuh a ni. Damlote tan tangkai taka hman a nih hnuin khawl a lo upat deuh tak avang leh khawl thar tha zawk mamawhna a lo san zel avangin NEC ah khawl thar leina tur dil a ni a. March ni 1, 2012 khan NEC atangin Rs. 280.00 lakh leh Rs. 20.00 lakh State Share sum hmuh niin 16 Slice CT Scan machine, GE Health Care siam lei a ni a, August ni 10, 2013 khan khawl thar hi hman tan a ni. He khawl hi a lo upat deuh tak avang leh repair a ngaih chhoh zeuh zeuh tak avangin tuna khawl thar hi lei tura hmalak a ni leh ta a ni.

Civil Hospital Aizawl ah hian kum 2008 October thla khan Oxygen Generating Plant hmasa ber 150 LPM capacity niin October 2008 khan bun a ni a, a lo upat a repair a ngaih tak zeuh zeuh avangin NEDP kaltlangin kum 2017-18 khan khawl hmasa thlakna tur 200 LPM capacity leina Rs. 72,50,000/- hmuh niin, March 2008 atanga hman a ni. He khawl hian Civil Hospital, Aizawl mamawh a phuhru zo lo nia hriat a nih vangin Ministry of DoNER hnuaia North East Special Infrastructure Development Scheme (NESIDS) kaltlangin 500 LPM capacity bun belhna tur dil leh a ni a, vawiin hian hman theih tura hawn a ni ta a ni.

Vawiina khawl thar pahnih hawnna puala inkhawm hi Dr F. Lallianhlira, Principal Director, H&FW in a kaihruai a, Health secretary Pu R.Lalramnghaka’n thu sawina hun hmangin, Dr T. Lalhmangaihi, Director, H&ME in technical report a pe a, Dr KK Chhetri, Medical Superintendent, CHA in lawmthu sawina in a khar a ni.

Attachment

  • Loading attachment...