No.353/2020-2021

Vawiin khan Gov't Zawlnuam College-ah Dr Lalrozama, IAS Chairman, DLTF/District Bawrhsap chuan Mamit District ramri hrula Village Level Task Force hruaitute kawmna a nei.

Khawvel puma hripui leng mek laka, Mamit District mipuite himna tura rim leh hah taka duty, Village Level Task Force hrang hrangte hmalakna chu District Bawrhsap chuan thlamuanthlak a tih thu a sawi a, kan thenawm State-ah hrikai hmuh an nih tak avangin, ramri hrula awm, Langkaih Group leh Taitesena Group huam chhung khaw hrang hranga kalkhan awm thei zawng zawngah ngawrh taka duty kalpui chhoh mek zel a ni a. Hripui laka ramri veng tura thawkchhuakte chu raldo tur kan nih loh avangin silai nena duty lo turin a ngen bawk a ni.

Meeting-ah hian khaw hrang hranga Village Level Task Force hruaitute hian an mahni huam chhung theuha ramri venhim hna an thawh dan leh duty post an siam dan report pe-in, harsatna an tawh hrang hrangte sawiho zui a ni a. Langkaih Group YMA President hnen atangin eirawngbawlna gas-ah Tripura lama lakluh thin tihtawp a nih tak avanga harsatna an neih thu report ngaihthlak a nih bakah Taitesena Group YMA President pawh-in an huam chhungah duty post 30 siam niin hengah te hian Tlawmngaia duty mi 150 lai an awm thu a sawi bawk.

Ei leh bar, nitin mamawh hrang hrangah harsatna awm theite thlirho zui niin Sawrkar atanga Ration Card neilo leh Sipai duty- te tan Ration chungchangah harsatna an tawh thu ngaihthlak a ni a, hnathawhna avang leh Ration card neihloh vanga buhfaia harsatna neite tan hian felfai taka ziakin DC Office-ah thehlut tura tih an ni.

Vawiin thutkhawm-ah hian ramri ven hna ngawrh leh uluk taka kalpui mek zel a nih laia, thenawm State atanga ruihlo lakluh tum an la awm thin chu engtianga hmalak chi nge ni ang tih sawiho a ni a. Heng khaw hrang hranga VLTF te nen hian ruahmanna siam niin, mahni veng/khua theuha hetiang tih ching awmte chu, dahhran/khunghran mai ni se tih a ni. Hemi kawngah hian a huam chhung VLTF te theuh hmala tura tih an ni a. Langkaih Group leh Taitesena Group ramri hrul venhim hna thawk tura, Mizoram Sawrkar-in Police duty tur mi 70 a pek belhte chu khaw dinhmun a zira, an duty-na tur siam rem a nih thu Kawrthah SDPO chuan a sawi bawk.

Vawiin Meeting-ah hian SP, Mamit, BDO, Zawlnuam, CMO, DCSO, SDPO Mamit, SDPO, Kawrthah, Pu Lalhmachhuana, Central YMA Vice President, President Mamit District Village Council Association, Sub Hqrs YMA hruaitute, President Langkaih leh Taitesena Group YMA bakah Khaw hrang hrang 15 atanga VLTF aiawh mi 29 te an tel a ni.

Attachment

  • Loading attachment...