1113/2024-2025

Dated Serchhip, the 9^th July, 2024: Vawiin khan Serchhip DC Conference Hall-ah kum tling lo naupang/tleirawl hnathawka chhawr Child Adolescent Labour leh Child Trafficking chungchang inzirtirna Sensitization Workshop neih a ni a. He hunah hian Serchhip DC Pu Paul L.Khuma chu khuallian a ni.

Pu Paul L.Khuma chuan dan kalha naupang kumtling lo hnathawka chhawr luih leh naupang hralha sumdawn (child trafficking) chungchangah Serchhip District chuan vawiin thlenga case kan la nei lo chu a lawmawm a, chutihrual chuan hetiang thil hi kan chungah leh kan khawtlangah a thlen ve lohna tura tan kan lak a tul a, a zirtir chhawng tu leh pu darhtu ni turin mitin te kan pawimawh a ni, a ti. Naupang kum tling lo hnathawka chhawr chungchangah tum reng vang ni lo, hriatlohna avanga dan kalha naupang hnathawk a chhawr te kan lo awm thei, tih sawiin India ram Dan in child labour a hrilhfiah leh a khap dan kalphung te, inkaihhruaina leh hremna awm thei te kan inzirtir nasat a ngai hle, DC chuan a ti a. Kan rinlohna lam atangin inbumna avangin Child Trafficking tuartu kan lo ni reng thei tih te hriain, fimkhur a ngai a; khawtlangah pawh inzirtir a ngai hle tiin Sensitazion Programme pawh neih chhoh zel tum a nih thu leh vawiina kalkhawm te pawh mi dangte hrilhchhawngtu ni turin a chah a ni.

Child and Adolescent Labour (Prohibition and Regulation) 1986 chuan naupang kum tling lote an taksa leh rilru hriselna atana him lo eizawna hmuna hnathawka chhawr a khap a. Naupang kum 14 hnuai lam te phei chu an zirna ti buai zawngin eng hna mah thawh phal a ni lo a. Hna reng reng naupang theihna leh zahawmna hlohtirtu emaw; naupang taksa  leh rilru hmasawnna leh thanna dal thei tu emaw, an zirna tibahlah tirtu emaw, zirna chawlhsan ngai khawpa thawh ngai hna te reng reng khap tlat a ni. Tleirawl te hi zan dar 7 atanga zing dar 8 inkarah inhlawhfaa chhawr phal a ni lo a. An taksaah danglamna leh hmasawnna la insiammek te an nih avangin an hriselna atana pawi thei tur te, an nunna atana hlauhawm ang chi reng rengah inhlawhfak khap a ni a. Chhawr lui an awm a nih chuan dan anga hrem theih an ni.

Mihring hmanga sumdawnna human trafficking hi khawvela organised crime hluar ber dawttu a ni a, human trafficking thleng zinga a tuartu za zela 27 hi naupang - child trafficking case a ni a. Mizoramah hian April 2019 atanga June 2024 chhung khan child trafficking case hi 23 (hmeichhia 10 leh mipa 13) a lut tawh a. Serchhip District ah erawh child trafficking case hi a la awm lo a ni. Serchhip District ah hian Anti Human Trafficking Unit din niin child trafficking case bik khawihtu tura ruat an ni a. Inkaihhruaina mumal tak neiin an kal a, training pawh vawi engemawzat an nei tawh a ni.

DC kaihhruaina hnuaiah Vigillance Team for Inspection and Monitoring on Prevention of Illegal Transportation of Children chu Serchhipah din a ni tawh a. He team hian a vawikhatna atan Serchhipah child labour leh trafficking a awm leh awm loh enfiah turin rescue operation chu tunkar July ni 11 leh 12 hian Serchhip ah an nei dawn a ni.

Vawiin programme Additional DC Pu Lalrinzuala kaihhruaiah hian resource person pahnih - Pi Lalsiampuii, District Child Protection Officer leh Pu Lalrinhlua, Advocate ten Child Adolescent Labour leh Child Trafficking chungchang zirtirna an pe a. Official te bakah bazar nuho te, workshop neitute, VC leh khawtlang hruaitute, NGO hrang hrang te leh chanchinbumite an tel a ni.