1114/2024-2025

India-a kan hman Parliamentary Democracy-ah hian Assembly Committee-te hian hmun pawimawh tak an luah a, Indian Parliament-a Parliamentary Committee hrang hrang a awm laiin State-tinah Assembly Committee kan awm thung a. He’ng Committee-te hian Assembly aiawhin, Assembly-in a tih tur hrang hrang chanvo leh thiltihtheihnate chu Rules of Procedure and Conduct of Business hmangin a hlan chhawng a, he Rules of Procedure and Conduct of Business hi India Danpui (Indian Constitution) Article 208 hnuaia Assembly-in a siam a ni.

Assembly Committee-te hi Assembly aiawha Assembly chanvo hrang hrang hlentu an nih angin session loh laia thu khawm thin ni mah se 'Assembly in Session' anga ngaih a ni a, India Danpui (Indian Constitution) Article 194 hnuaia kan neihte leh a dangte pawh Assembly Committee koh a nih chhung hian a nung reng a. Member-te leh Assembly Official-te duty hlen tur hi tih buai thiang a ni lo a ni. Tin, Assembly Commissioner & Secretary pawh Rules of Procedure and Conduct of Business hnuaia Rule 207-in a tarlan angin, Assembly Committee-tina Secretary a ni tel nghe nghe bawk.

He’ng Committee hrang hrangte zinga upa ber chu Public Accounts Committee hi a ni a. Indian Parliament-ah chuan Government of India Act, 1919 (Montford Reforms) behchhana din kha a ni. Mizoramah pawh UT hunlai atangin he Committee zahawm tak hi a lo awm tawh nghe nghe a, State kan nih hnu pawhin Assembly zahawm tak chuan Rules of Procedure and Conduct of Business hmangin a din nghal bawk a. Assembly zahawm takin a aiawha tih tur chanvo pek dante chu:

249 (1) "Mizoram Sawrkar hman atana Assembly-in sum a phalsak hman ral chhinchhiahna te, Mizoram Sawrkar Annual Financial Statement-te leh account dang Assembly-a pharh te, Committee-in tul a tih anga lo en dik turin Committee on Public Accounts a awm ang." 

(2) "Mizoram Sawrkar Appropriation Accounts leh chumi chungchanga Comptroller & Auditor General report-te a en diknaah Committee chuan he’ng a hnuaia tarlante hi zawm a nih leh nih loh dan a en fiah ang: 

a. Account-a sum hman ral anga tarlante chu a hmanna tur atana ruahman ang thlapa hman a ni em; tin, a hmanna nen a inmil em; 

b. Sum hman ral chu a phuartu (Authority) duh dan nen a inmil thlap em; 

c. Thuneitute’n chutiang tura dan an siam angin re-appropriation tih a ni em; 

Sawrkar Department-te’n mipui sum an hman dik tawk lohna hi Audit Report hmanga hai lan a lo ni fo tawh a, Public Accounts Committee pawhin hriatthiamna thui tak a nei tawh thin a. Chu chu remchangah lain sawrkar ban pakhat Legislature zahawmna leh thuneihna hi Executive  lamin palzam chang a nei ta deuh em tih ngaihdan a awm a, hemi chungchang hi 9th Mizoram Legislative Assembly-a Public Accounts Committee thukhawm chuan uluk takin a ngaihtuah a. Committee chuan mipuite laka a mawhphurhna hlen tur leh sawrkar sum luangral tur hum a tum dante puanzar tha a ti a, chumi kawnga sawrkar Department hrang hrangte’n lo hre tawh tura a duh sawi lan nan leh insiamthatna hun an neih theih nan he Press Statement hi siam a lo ni ta a ni. 

Mipui sum (public money) tih chingpen chungchang thu-ah Public Accounts Committee chuan, a tul ang leh dan anga hma la tur a nih angin, ram leh hnam tana hmalak a hreh dawn lo a, hei hi Department-te pawhin chiang takin hria se a duh a. A tul anga enquiry chak zawka lain, evidence koh kawngah leh case bawhzui kawngah khauh zawka kal ngei a tum a, chumi tur chuan Audit Report piah lamah Compliance Report pawh uluk takin a zir a, a tul ang zela 'spot verification’ nei tur pawhin a inpuahchah nghal bawk a. Sum hman dan felhlel nia langte chu en liam mai loin, term liam taa Public Accounts Committee observation-te lo neih sate pawh chak takin a bawhzui mek zel a, Audit Report-a parawise-comment hrang hrang atangin a hmun ngeia tlawh tur pawh eng emaw zat a thlang fel tawh nghe nghe a ni. Sawrkar ban pathumte zinga Legislature hna thawh, session chhung chauh nia ngaihdan awm thin hi Committee chuan thiah ngei a tum a, zau zawka mipui hmaa a mawhphurħna tlangzarh leh mipuite’n an chanvo dik tak an chana, mipui sum hmanna pawh dik taka hman a ni ngei em tih bawhzui kawngah theihtawp chhuah a tum a ni.