375/2024-2025 

2024 Ṭau thla ni 26: Doordarshan Kendra (DDK) Aizawla Director (News) Pu Nampibou Marinmai chuan vawiin khan Lawngtlai tlawhin, DC leh SP te meeting a neihpui.

DDK Aizawl Director (N) Pu Nampibou Marinmai chuan Lawngtlai District Bawrhsap Pu Cheemala Siva Gopal Reddy chu a office chamber-ah hmuin, dan leh thupek kenkawhna leh inrelbawlna kawng hrang hranga Lawngtlai District dinhmun an sawi dun a. DDK Director chuan Lawngtlai District-a DDK hnuaia thawktute'n thu pawimawh an lak khawmna kawngah a ṭul anga kaihruai a, thawhpui tur leh inlaichinna ṭha neihpui turin Bawrhsap chu a ngen a ni.

DDK Director hian Lawngtlai District Superintendent of Police Pu R. Lokeshwaran pawh a office chamber-ah hmuin, venhimna kaihhnawiha Lawngtlai District dinhmun an sawi dun a. DDK Director chuan social media-ah thuthang dik lo leh mipui tichi-ai thei theh darh awm ṭhin chu a pawi hle tih sawiin, DDK kal tlangin thu belh chian dawl chauh tihchhuah ṭhin a nih thu leh, chumi atan chuan DDK thawktute'n hriat duh pawimawh an neih changa inhawng taka lo chhawn ṭhin turin SP chu a ngen a ni.

DDK Director hi Lawngtlai District Information & Public Relations Officer Pu C. Lalhruaitluanga leh Lawngtlai District-a DDK Stringer-te'n an ṭawiawm a. Lawngtlai Vengpuia Doordarshan Low Power Transmitter TV Relay Centre hluihlawn tawh chu a hmunah tlawhin, mipui tana ṭangkai zawka hman theih dan tur kawng zawn a tum thu a sawi a. Lawngtlai daia Kanaan Refugee Camp a tlawh bakah, Mizoram Upa Pawl (MUP) District Headquarters, Lawngtlai hruaitute nen Lawngtlaia Community Radio Station din theih dan tur chungchang an sawi ho bawk.