1144/2022-2023
Champhai, the 5th July, 2022: Nimin chawhnu dar 2:30 khan Pi H.Lalhmachhuani, District Development Manager (DDM), National Bank for Agriculture and Rural Development (NABARD) Champhai chuan Kelkang Multipurpose Co-operative Society Ltd. hnuaia Primary Agriculture Credit Co-operative Society (PACS) Office thar a hawng.

Pi H.Lalhmachhuani chuan PACS tangkaina leh hmalakna hrang hrangte sawiin, hnathawhte Computer nena thlunzawma tihchangtlun a nih theih nana NABARD in Ministry-a a thlen 'Computerisation of PACS' tih chu Cabinet Committee on Economic Affairs (CCEA) chuan pawmpuiin, reiloteah PACS te chu computer leh hmanraw changkang zawk hmanga thuamthat vek tum a ni, a ti bawk.

He hun hi Pu S.Lalremngheta, District Cooperative Officer (DCO) leh Pu Jyoti Munna Soren, Lead District Manager (LDM) te pawhin hmanpuiin kalkhawmte chu PACS hmang tangkai tur leh Bank hrang hrangte uar lehzuala dawra chhawr tangkai thin turin an fuih a ni.

Kelkang PACS Office thara hman tur hian NABARD chuan Cooperative Development Fund (CDF) Infrastructure Assistance atangin tanpuina cheng nuai 2 man hu bungrua a hlan nghal a. Office hawnna hunah hian PACS hnuaia account hawng thar mi 42 te hnenah passbook semchhuah a ni bawk.

Kelkang Multipurpose Co-operative Society Ltd. hi kum 2015 ah hawn niin, tunah hian member 70 an awm mek a ni.