1854/2024-2025

Aizawl, the 31st August, 2024: District Disaster Management Authority (DDMA) Aizawl Chairman Er. C. Lalhriatpuia, Deputy Commissioner, Aizawl chuan Section 34 (K) leh Section 26 of Disaster Management Act, 2005 in thuneihna a pek tlawhchhanin mipuite him tlan nan Pu Sangthanmawia buliding, Vaivakawn Zohnuai chu a rang thei ang bera thiah turin August ni 29, 2024 khan thupek a chhuah. Hei hi a bulhnaia chengte, ke a kal mipui leh lirtheia veivakte himna tura ruahman a ni.

Thupek chhuahin a tarlan dan chuan kum 2022 atang khan Vaivakawn Zohnuai lei tlahniam hi lo lang tanin, ADDMA, S.P (Aizawl), S.P (Traffic), Aizawl, PWD, PHED, P&E, SIPMIU, G&M leh a kaihhnawih NGO te'n tum engemawzah endikna joint inspection an lo nei tawh a ni. 

Lei tlahniamin harsatna a thlente tiziaawm tur leh Vaivakawn Zohnuai Road leh NH-06 te changtlung zawka cheibawl chungchang ngaihtuahin 10.8.2023 khan meeting pawh neih a lo ni tawh a, 21.8.2024 khan Zonal Officer, Geologist leh AMC te'n Pu Sangthanmawia buliding dinhmun (technical assessment) zirchiangin site inspection pawh an lo nei tawh bawk a. Zirchianna atanga a landanin building hi a inherh mai bakah a âwn a; hemi avang hian a bang, chhuat leh retaining wall hmun tam takah khi a awm a, chenna atan a him loh phah ta a ni. 

Heng bakah hian PWD, Quality Control, Research & Development Division chuan building him leh him loh zirchianna an nei bawk a. Sr. EE, PWD, Quality Control, Research & Development Division-in zirchianna a report dan chuan concrete chak zawng hi M10 to M19 inkar niin, bang atana leirawhchan hman (brick wall), beam leh column-ahte khi tam tak a awm a, heng bakah hian kawng chung lama ground floor level chu road level atanga tehin feet 2 in a tla hniam a ni. 

Building hi Vaivakawn Zohnuai road lamah 88.88 degree velin a âwn a. Hemi a nih avang hian DDMA Aizawl chuan Pu Sangthanmawia, building, Vaivakawn, Aizawl chu ruah tla zel avanga lei tlahniamin a dinhmun ti chhiaa mihring nunna leh a vela in leh lo ah harsatna nasa zawk a thlen theih avangin thiah tul a ti ta a ni. 

In thiah a nih chhunga hnathawktute himna ngaihtuaha a tul anga hmalaknate vil turin Sr. Executive Engineer, PWD, Quality Control, Research & Development Division, Aizawl chu ruat a ni a. Lirthei leh mipui veivakte him tlan nana hemi chungchang vila ruahmanna siam turin Sr. Superintendent of Police, Traffic, Aizawl leh Sr. Superintendent of Police, Aizawl te chu ruat an ni bawk.