1855/2024-2025

Aizawl, the 31st of August, 2024: Vawiin tlai khan Pu Lalnghinglova Hmar, Minister of State, Sports & Youth Services Department chuan Dr. Mansukh Mandaviya, Hon’ble Union Minister, Ministry of Youth Affairs and Sports chu New Delhi-a a chenna inah a hmu a, Sawrkar laipui scheme hrang hrang hmanga Mizoram Sports tihhmasawn theih dan an sawidun.

Mizoram Sports Minister Pu Lalnghinglova Hmar chuan Mizoram chu State lian lo leh mihring tlemna ni mah se, India leh rampawn thlenga hriat hlawh Mizo infiammi engemawzah an awm thu sawiin, Mizo thalaite’n sports-ah theihna sang tak an nei tih Union Sports Minister hnenah hian a thlen a. Sawrkar laipui hnuaia sports tihhmasawnna tur scheme hrang hrangah Mizoram chu tel ve ngei se a duh thu a sawi a. Union Sports Minister chuan Mizoram leh India sports hmasawn nan theihtawp chhuah a tum tih sawiin, Sports Ministry hnuaia scheme hrang hrang, a bikin Khelo India Scheme hnuaia Mizoram tana hmalak dan tur an thlirdun nghal a ni.

Pu Lalnghinglova Hmar chuan India-in kum 2036-a Olympic Games thlen a tumnaah Mizoram in tel ve ngei a duh tih a sawi a. Hemi atana inpuahchahna hmasa, June ni 13-14, 2024 chhunga Aizawl-a Mizoram Sports Conclave buatsaih chu a khaikhawmna lehkhabu Union Sports Minister hnenah a pe a ni. Sports discipline hrang hranga talent nei thate hai chhuah nan Mizoram khua zawng zawng hrutchhuakin sports coaching kalpui tum a nih dan presentation a pe bawk.

Union Sports Minister chuan Vision 2036 Olympics nei chunga Mizoram Sawrkar hma lo lak tawh dan leh hmathlir a neihte chu lawmawm a tih thu sawiin, Mizoram Sports Minister chu a theih anga puih a tiam a ni.

Pu Lalnghinglova Hmar in Mizoram ngeia sports hmasawnna chungchang sawidun tura a sawm angin, remchang hmasa berah Mizoram tlawh a tum thu Union Sports Minister chuan a sawi bawk a ni.