719/2022-2023
Khawzawl, the 31st May, 2022: Khawzawl District Disaster Management Authority (DDMA) chu vawiin chawhnu dar 2:00 khan DC Conference Hall-ah an Chairman Bawrhsap Pu C.C. Lalchhuangkima kaihhruaiin an thukhawm a, he hunah hian lirnghing lo thlen thulha chetlak dan tur inzirtirna leh nunchan zirna (Mock Drill) neih dan tur rel a ni.

Pu C.C. Lalchhuangkima chuan lirnghing chu engtik hunah pawh thleng thei reng a nih avangin chetlak kawngah mitin kan inpeih a tul thu a sawi a. Khawzawl District-ah lirnghing thleng thei laka inbuatsaihna leh nunchan zirna (Mock Drill) neih vawi khatna tur a nih angin theihtawp chhuah a tul thu a sawi bawk.

Thutkhawmah hian Mock Drill neih dan turte, leh District dangten an kalpui tawh dan uluk taka sawiho a ni a. Felfai zawka ruahhmanna siam turin DC Office chu mawhphurhna pek niin, remchang hmasa berah ruahhmanna siamte chu thlirho tura thutkhawm leh rel a ni.