1086/2026-2027

Aizawl the 19th June 2026: Vawiin khan Department of Economic Affairs, Ministry of Finance chuan Shillong-ah “Leveraging Externally Aided Projects (EAPs) in the North Eastern State” tih thupui hmangin Seminar / Workshop a buatsaih a. A hawnna inkhawm Union Finance Minister Pi Nirmala Sitharaman kaihhruiah hian hmarchhak state Chief Minister zawng zawngte leh state tin atanga official pawimawhte an tel a. Chief Minister Pu Lalduhoma pawhin thu a sawi.

Seminar hi EAP kalpuina kawnga hmarchhak bialte thuam chakna (capacity building) leh an tawnhriatte inhrilhtawnna (experience sharing) atana buatsaih a ni a. Kum eng emaw zat kaltaa state hrang hranga EAP kalpui tawhte thlirletna neih a nih bakah Externally Aided Project tha zawk, ram tana chhawr nahawm zawk duang chhuak zel tura inrawnkhawmna a ni nghal bawk.

Chief Minister Pu Lalduhoma chuan, EAP kaltlang hian ram dang atangin mithiam tak takten kan hmalakna min rawn enpui thin a, kan harsatnate an rawn zir a, an thiamna leh tawnhriatte min hrilh thin a. Hei hi kan hlawkpui hle. Mizoram hi hmarchhak state zinga EAP lian tham dawng hmasa pawl kan ni a, Aizawl – Thenzawl – Lunglei World Bank Road kan nei a. ADB Fund hmangin kawngpui dang pawh kan lai a, ramri lam inkalpawhna tichak turin Mizoram State Roads II Project kan nei a, Urban Infrastructure te, Water Supply tihchangtlunna te, sorkar sum enkawlna tihchangtlunna Public Resource management Programme chenin kan thawk a.

Agriculture lamah IFAD kaltlangin FOCUS kan kalpui a, FOSUS zarah hian chhungkaw 55,000 te chu an sum lakluh 43% zetin a pung a, leilung venhimna lamah hma kan sawnpui bawk a. Hriselna lamah World Bank puihnain Health System Strengthening Project kan kalpui a, sorkar enkawl hriselna hmunhma (centres/hospital) 62 zet chu NQAS Certified an nih phah a. He project kal kalpui hma hian Mizoramin NQAS Certified Centre leh Hospital kan la nei ngai lo a ni. JICA sum hmangin Super Speciality Cancer Centre kan sa mek a, ADB fund rinchhanin Universal Health Care Scheme kan kalpui mek bawk a. Energy lama intodelh tumin New Development Bank fund hmangin 24 MW Tuirini HEP bul kan tan leh tawh bawk.

Externally Aided Projects te hi infrastructure tha leh lian tham tak tak neih nan kan hmang a, project tam zawk hmuh theih kan mamawh hle a, hmarchhak bial tana kan hmuh theih zat tam zawng bithliah (EAP Ceiling) pawh hi min tihsansak ula kan duh a ni, a ti.

Seminar hawnna inkhawmah hian Pi Anuradha Thakur, Secretary, DEA chuan kalkhawmte lawmna thu a sawi a, Chairman Pi Nirmala Sitharaman chuan Seminar neih chhan (Keynote Address) a sawi a, hmarchhak state Chief Minister zawng zawngte bakah Pu Johannes Zutt, Vice President, South Asia Region, World Bank Group pawhin thu a sawi a ni.