1085/2026-2027

Lunglei, 2026 Nikir thla ni 19: Vawiin khan Mizoram sawrkara Urban Development & Poverty Alleviation (UD&PA) Minister Pu K. Sapdanga chuan Lunglei khawpui chhunga UD&PA hnuaia hma lakna hrang hrangte tlawhin, a dinhmun leh hma lak chhunzawm dan tur a hmunah a enfiah.

UD&PA Minister Pu K. Sapdanga hi Lunglei South bialtu MLA Pu Lalramliana Papuia, Lunglei West bialtu MLA Pu T. Lalhlimpuia, Lunglei Municipal Council (LMC) Chairman Pu Lalzuithanga leh councillor-te, UD&PA Commissioner & Secretary Pu K. Lalthawmmawia, Director Pu Jacob Lalawmpuia, LMC Chief Executive Officer Pu Lalhmansanga leh official dangte'n an ṭawiawm a. Tuialhthei renchemna atan hma lakna tlawh kualnaah hian lirthei hrang hranga inzui lovin, Mizoram State Transport (MST) bus hmangin a huhovin an kal a ni.

UD&PA Minister hian Chanmari-a vantlang len khawthawnna Lunglei Park chei ṭhat hna thawh tur leh hman nawn theih bungraw dah khawmna leh lak chhuahna hmunpui 3R (Reduce, Reuse, Recycle) Centre te, Circuit House penga hahchawlhna Pocket Park siamna tura ruahman te, C. Ṭhuamluaia Mual bula lirthei dahna Multi-Level Car Parking sak mek te, Pukpuia Lunglei khawpui bawlhhlawh sawngbawlna tur Solid Waste Management Centre-II sak mek te, Saikuti Hall chei ṭhat tur leh Lunglei Pulse hnuaia khawpui chei mawina tur leh hmasawnna ruhrel dinna tur te a hmunah a tlawh kual a. Hna kal mek a endik bakah, MLA, LMC hotute leh UD&PA hotute nen chak zawk leh ṭha zawka hna thawh a nih theih nana hmachhawp leh ruahmanna te, Lunglei khawpui hmasawnna atana mamawh hrang hrangte an sawi ho nghal.

Solid Waste Management Centre-II, Pukpui hi Swachh Bharat Mission (Urban) 2.0 leh ringfenced fund aṭanga thawh niin, cheng nuai 698.01 senna tur a ni a. A hna civil work hi LHM Infra, Khatla, Aizawl te'n thawkin, October ni 6, 2024 khan hna an ṭan a, October 2026-ah zawh theih beisei a ni. A panna kawng (approach road) laih zawh tawh niin, PCC pavement-a siam mek a ni a. A hranga bawlhhlawh ṭawih thei sawngbawlna tur leh ṭawih thei lo sawngbawlna tur (wet & dry waste) building leh site office building sak hna thawh mek niin, tun dinhmunah hna 70% vel thawh zawh tawh a ni a. Civil work bakah hian bawlhhlawh sawngbawlna atana khawl leh hmanraw mamawh te pawh ngaihtuah mek a ni bawk a. Minister chuan Lunglei khawpui chuan bawlhhlawh sawngbawlna hmun ṭha tak pahnih a nei thuai dawn tih sawiin, ṭangkai leh hlawhtling taka hman a nih theih nan tun aṭangin mipuite'n in chhung khura bawlhhlawh thliar hran lo zir lawk a pawimawh thu a sawi.

Lungleia 3R Centre hmasa ber, Chanmari-a mi hi Mizoram Bana Kaih (Handholding) Scheme hnuaia Mizoram District Transformation Programme (MDTP), Swachh Bharat Mission-Urban 2.0 leh DAY-NULM hma laknaa June ni 5, 2026-a hawn, UD&PA enkawl a ni a. Lunglei Sub-Headquarters MHIP te nen ṭang tlangin Lunglei khawpui chhunga MHIP branch hrang hrangte'n bungrua, thawmhnaw leh lehkhabu hlui an khawn khawmte chu a mamawh apiangte'n an lak theih turin 3R Centre-ah hian dah niin, Self Help Group te'n thil chhia aṭanga thil ṭangkai zawk an siamte an pho chhuak bawk a. Bungrua hi lirthei laihawl phur 10 chuang dawn tawh niin, hawn a nih aṭangin pisa kai niah mamawh laa dawrtu ni tin chawh rualin mi 150 vel zel an awm anga chhinchhiah a ni. Minister chuan 3R Centre chu hnawk leh bawlhhlawh chang mai turte a mamawh zawk mi tam takin an lo hman ṭangkai tura dah khawmna a nih angin bawlhhlawh titlemtu, hman nawn theih hman nawn leh thil ṭangkai zawka siamna, faina leh thianghlimna leh inrenchemna atana hma lakna pawimawh tak a nih thu a sawi a. Lungleia 3R Centre kalpui dan chu ṭha a tih thu leh chhawm nun zel ni se a duh thu sawiin, Centre hlawhtlinna atana UD&PA-a thawktute, MHIP, SHG leh bungraw thawhtute inpekna leh thawh rimnaah lawm thu a sawi a. An bungrua, thawmhnaw leh lehkhabu hluite mi dang tan 3R Centre-ah hian thawh a, a mamawhtute pawhin inthlahrung lova an mamawh lak nan hmang ṭangkai zel turin mipuite a chah.

C. Ṭhuamluaia Mual bula Multi-Level Car Parking tur hi State Priority Project (SPP) hnuaiah cheng nuai 300 senga sak mek niin, a sak hna hi Brilliant Consultancy, Chaltlang, Aizawl te'n an thawk a. March ni 24, 2026 khan hna ṭanin, February ni 28, 2028-a zawh tur a ni a. Lirthei dahna tur hi chhawng thum ruahman niin, 1st Floor-ah 2 Wheeler 40, 2nd Floor-ah 4 Wheeler 18 leh 3rd Floor-ah 4 Wheeler 20 dah theih tura ruahman a ni a. Tunah hian a hmun laih hna thawh mek niin, hna pum pui aṭangin zaa sawmhnih (20%) vel thawh tawh a ni a. Minister chuan C. Ṭhuamluaia Mual leh a chehvela hun hmangtute tan lirthei dahna leh chet vel tiziaawm tur hma lakna chu ṭha tak leh a hun taka zawh tum turin hna thawktute a chah. 

Lunglei Park chei ṭhat hna hi Urban Infrastructure Development Fund (UIDF) hnuaiah cheng nuai 200 senga thawh tur niin, hna thawk tur hian A3 Design Build, Zonuam, Aizawl te thlan an ni a. Hna hi June 2026 chhunga ṭan hman beisei niin, thla 18 chhunga zawh tur a ni a. Minister chuan contractor-te chu hna ṭan thuai tum tur leh a ṭha thei ang ber leh chak thei ang bera thawh zawh tum turin a chah.

Minister hian Circuit House penga Pocket Park siamna tur ruahmanna te, SPP hnuaia cheng nuai 500 senga Saikuti Hall chei ṭhat tur ruahmanna leh Lunglei Pulse hnuaia cheng nuai 1,262 senga khawpui chei mawina tur leh hmasawnna ruhrel hrang hrang dinna tur ruahmanna te pawh chak taka bawhzui zel a nih a beisei thu sawiin, Lunglei khawpui hmel lanna leh mipui tana ṭangkai tur a nih angin mawhphurtute chu theih tawp chhuah tur leh ṭha tak leh hlawhtling taka kalpui a nih theih nana hma la turin a chah.