CEO Pu Ashwani Kumar chuan vawiin tlai khan chanchinbu mite kawmin Election Commission of India-in Mizoram Legislative Assembly inthlan hun atan ni 4 December, 2013 (Nilaini) a ruat thu a hriattir a, ni 8 December 2013 ah vote chhiar a nih tur a puang bawk.

CEO chuan inthlanpui atana inbuatsaihna chungchang tlangpui sawiin Mizoram puma voter awm zat mi 6,86,305 te hnenah Photo Identity card pek vek an nih tawh thu te a tarlang a, Polling Station 1126 -a EVM hman tur 1700 peih fel vek a nih thu leh election training pawh District tinah September thla chhung khan zawh fel vek a nih tawh thu a sawifiah bawk. Inthlan laia duty tur hian Mizoram Police mi 3,400 bakah Sorkar Laipui atangin para military company 31 dil mek a nih thu a sawi lang bawk. Inthlan hma hian Voter zawng zawng hnenah an E/Roll number leh thil tul dangte chuanna Voters’ Slip pek fel vek an nih tur thu a sawi lang bawk. Kum kalta aia vote neitu ten an mawhphurhna pawimawhna leh hlutzia hriaa vote thlak a that theih nan uar taka inzirtir chhoh zel tum a nih thu a puang bawk. Inthlan puan a nih atang hian Model Code of Conduct chu kenkawh nghal a ni dawn a, inthlanna thianghlim leh felfai tak neih a nih theih nan inthlannaa mawhphur tura ruat team hrang hrang te chuan uluk takin party leh candidate te chu an vil reng dawn a ni, a ti.

Mahni hming chuanna E/Roll chungchang hrechiang duh tan mobile hmangin 9211728082 ah sms hmangin MZELN mahni Voter ID Card No. chhutzawma (e.g. MZELNxxxxx22426) thawnin a a duh apiang tan zawh fiah theih reng a ni a, inthlan chungchanga zawh chian tur nei te tan phone number 1950 ah a thlawnin zawhfiah theih reng a ni bawk. Inthlanpui atana Mizoram inbuatsaih dan te enthlithlai tur hian Election Commission of India member te chu kar leh hian an lo kal beisei a ni bawk.