Nimin chawhnu dar 2 khan PHE Minister Pu S. Hiato chuan Vairengte tui lakna tih lenna tur Augmentation Water Supply Scheme pawisa cheng nuai 783.11 senga thawh tur bul tanna lung a phum.

Lung phum zawha inkhawm, Vairengte Community Hall-a neihah thu sawiin Pu S. Hiato chuan Mizoram khaw tina tui thianghlim pekna hi sawrkar chuan a ngai pawimawh em em a. Tui lakna harsa tak tak khua ah te pawh gravity hmanga tui hipa tlang chhipa khaw tam takah pipe thui tak tak zama tui lak a ni tawh a. Tun dinhmunah Gravity-a tui lak la tih theih lohna khaw 7 a la awm a ni, a ti a. Mizote hi tlang chhipa awm kan nih avangin PHE ten tui lak hna an thawh kawngah harsatna a awm fo thin a, ram kan vah chereu nasat avangin kan tui hna te a kangchat nasa ta hle bawk a. Tui hna thar siam turin mitinte kan tanrual a ngai a, Deptt. thawktute pawh a tul anga tawiawm i tum ang u, a ti a ni.

Sawrkar hmalaknate sawiin Pu Hiato chuan NLUP hmanga kan hnate tluang taka thawka mi rethei eizawnna neilote tana tanpuina kan sem theih avang te, Rural Housing scheme hnuaia rethei In sak hna te tluang taka kan ti thei hi Pathian puihna liau liau a ni tiin hemi kawnga mipui tawiawmna pawh a lawmawm hle a ni, a ti a. Inthlanpui kan hmachhawn mek lai hian mipui ten thinlung thianghlim tak pu a ram leh mipui kaihruai tura mi tha thlang ngun turin a chah a ni.

Serlui bialtu MLA Pu K. Lalrinthanga pawhin thu sawiin a bial chhung Vairengte tana tui hnianghnar zawka lak theihna tur scheme tan theih a ni dawn ta chu a lawmthu a sawi a. Hmasawnna duhawm tak a bial chhungin a hmu mek a ni tiin Kolasib District Development Fund atanga Vairengte to Phaisen kawng cheng nuai 20 senga thawh tan a ni ta tih a sawi a. Hei bakah hian Phaisen to Aitlang kawng nuai 20 senna tur leh Phaisen to Chhimluang Lendenlui zau cheng nuai 20 senna tur tepawh thawh tan an ni ta bawk a ni, a ti.

Vairengte State Veng Community Hall pawh 15 lakh senga sak mek a ni, Pu Rinthanga chuan a ti bawk a ni. Vairengte tui lakna Augmentation Scheme thawhna tur sum senso tur hi NEC atanga hmuh a ni a. Thawh zawh a nih hunah chuan kum 2040 thlenga khaw mipuite tui chawm tura chhut a ni a, mipui pung zel tur hisapa mi 22495 chawm thei tur, mi pakhat zelin nitin tui 70 litres dawng thei tura chhut a ni.

Lung phum inkhawm hi Er. R. Lalfanliana, Engineer in Chief in a kaihruai a ni.