Plan Process decentralized-na atan leh Public Institutions & Public Services tihchangtlunna atana thingtlang mipuite kuta thuneihna (Communitisation) Nagaland Sorkar-in a pek dan leh an kalpui dan zirchiang tura din Study Team chuan vawiin chawhnu dar 1:30 khan Chief Minister Pu Lal Thanhawla hnenah Report an thehlut.  Study Team Member te hi Team Leader Pu Joseph Lalhimpuia, MLA, Vice Chairman, HPC 'L', Pu L.Colney (IAS Rtd.), Nagaland Chief Secretary hlui, Pu Lalchhuanawma Hrahsel, Chief Planning Officer, HPC 'L', leh Dr Lalrinchhana, Senior Research Officer, Planning Department te an ni a, an Report bu hi phek 67-a chhah a ni.

Study Team-in an zirchian atanga an hmuh danin Nagaland Sorkar chuan Village Council leh thingtlang mite kutah thuneihna lian tak a pe a, Village Development Board te dinin khaw mipui zawng zawngte huapin hma an la ho thin a, an tangkaipui thu an lo hrilh a ni.  Nagaland ah hian Education, Health, Water Supply & Sanitation leh Power & Electricity department pali-ah te Communitisation zawnga kalpui a ni a, khawtlangin an sum hman dan tur ruahmanna (plan) pawh sorkar office-a thuneitu ten relsak mai lovin anmahni khawtlang zawkin an rel fel thin a, nasa takin hma an sawn phah a, communitisation hlawkna tam tak zingah zirtirtu aikal an awm lo a, zirtirtu zelthel deuh chu hlawh an cut sak thei a, school standard a that phahin mipuite duh danin English Mediumin zirtirna an kalpui thei a, private English Medium school an mamawh hran tawh lo a ni. Electric leh tui supply a that phah a, electric bill ayanga sum khawnchhuah(revenue) a pung bawk. Health Sub-Centre ah damdawi tlakchham a awm lo a, neitu nihna tak tak nen mipui leh pawl hrang hrangte an phur hle a ni. Nagaland Sorkar hian Local Area Development Fund kalpuiin Constituency tin tan sum thahnem tham tak State Plan Fund atangin a ruahman thin a, bialtu MLA te nen kaihhruaina fel tak hnuaiah hma an la ho thin a ni.

Mizoram Study Team hian ni 6 April, 2010 khan Aizawl chhuahsanin ni 13 April, 2010 khan Aizawl an lo let leh a, Mizoram Sorkarin a pawimawhna hriaa hetianga Study Team Programme a ruahman avangin lawmthu an sawi a, Nagaland Sorkar-in State Guest-a duhsak taka an lo dawnsawn leh buaipuina zawng zawng avangin lawmthu an sawi bawk a ni.