MIZOFED Ltd. khawmpui vawi 13 na chu vawiin khan Aizawl-a Cooperative Hall, Babutlang ah neih a ni a. Co-operation Minister Pu JH Rothuama'n a hmanpui.
 
 
Minister chuan Mizorama bungraw man sang zel titlawm tu leh vengtu ah kan tang thei tih sawiin, hlawhbi san vangte, kawngchhiat vangte, tuilian vangte leh thil dang vangin bungraw zuartu thenkhatten bungrua chheprelin an ti to thin a, heng karah hian kan bungrua te a man ngaia mipuite hnenah pe chhuakin bungraw man to tur kan veng thei a ni a ti. Hemi kawngah hian Aizawl khawpui mai bakah thingtlang hmun kilkhawr thlenga society din-a tan la in mipui harsatna sutkian kawngah hma la zel turin Minister chuan a fuih.

Pu Rothuama chuan khawvel thangzelah ram changkang ten cooperative an hmang tangkai zel a, hemi kawngah hian tunhmaa neitu rilru kan put tawk lohna ah te tan la in mahni ta ang theuhvin tan kan lak thar a ngai a ni a ti a. Co-operative-a share kan neih tam hian society kan ti zahawm a. Kan share kan tih san chuan sorkar pawhin a tum tur a tisang thei a ni, a ti bawk.
 
Inkhawm hi  Pu Lalpekliana, Managing Director MIZOFED in a kaihruai a, Pu Vanengmawia,IAS, Secretary Cooperation leh Pu H.P. Sahu, IAS, Registrar Cooperation ten khawmpui hawnna inkhawm  hi an hmanpui. Chawhnu lamah ah rorel leh MIZOFED Board Members te thlanna neih a ni

Mizoram State Cooperative Marketing & Consumers’ Federation Ltd (MIZOFED) hi December 9,1981 khan din a ni a, tunah hian share holder awm zat Primary Co-op Society 263 an ni a. MIZOFED sumdawnna hi hlawm thuma then fel theih ang a ni a, chung te chu POL, LPG leh Consumer Goods te an ni a. Kum 2007-08 chhunga an sumdawnna chu hetiang hi a ni.

POL - Leina Rs 5,760.98 lakh; Hralhna Rs. 5,895.61 lakh
LPG - Leina Rs 1,117.62 lakh; Hralhna Rs. 1,223.01 lakh
Consumer goods Leina Rs. 908.28 lakh; Hralhna Rs. 1,061.44 lakh a ni.

MIZOFED ah hian hnathawktu 118, muster roll 18 leh deputation 2 an awm mek a ni.

Attachment

  • Loading attachment...