No.3154/2021-2022
Aizawl 25.11.2021: Chief Minister Pu Zoramthanga chuan vawiin khan Israel Ambassador Pu Naor Gilon leh First Secretary Political Pi Hodaya Avzada te nen Mizoram House, Chanakyapuri, New Delhi ah an inkawm. Mizorama hmasawnna hna thawk mek company TCIL leh WAPCOS hotute a kawm bawk.

Embassy of Israel, India hotute nen Chief Minister leh amah tawiawmtu official te chuan Mizoram hmasawnna hmachhawp hrang hrang te sawiho in, thawhho theih dante an sawiho a ni.

Chief Minister hian Tourism Minister Pu Robert Romawia Royte nen Lunglei leh Champhai tui lakna project siamtu tur Central Sorkar PSU zinga mi WAPCOS hotute a kawm bawk a. Chief Minister chuan tha taka DPR te siamzo vat tura hrilh a, Aizawl Smart City Project pawh chak zawka buaipui turin a hrilh bawk.

Hmasawnna ruhrel pawimawh tak tak din a nih theih nan a consultancy firm state sawrkarin a rawih Telecommunications Consultants India Limited, (TCIL) hotute chu vawiin khan kawm bawkin, project an duan mek bawhzui dan tur te sawiho a ni. TCIL hi Department of Telecommunications, Ministry of Communications hnuaia awm a ni.

Chief Minister hi State Planning Board Vice Chairman Pu H. Rammawi, Adviser to CM (Tech) Er. K. Lalsawmvela, OSD to CM Pu Rosangzuala leh official dangten an tawiawm a ni.