No.3155/2021-2022
Aizawl, 25 th November, 2021: School Education Minister Pu Lalchhandama Ralte chuan Mizoram sorkarin zirna a thuamchak avangin sorkar sikulah zirlai an pung a ti.

He thu hi Minister hian tukin khan Hnahlan Higher Secondary School a tlawhnaah a sawi a. Minister chuan sorkar sikulah zirlai an luh tam theih nan theihtawp chhuah a nih thu leh, hemi chawikang tur hian zirna in thuamthat hna kawng hrang hrangin thawh a ni a, hripui leng karah zirtirtu chi hrang hrang sanghnih bawr vel lak a ni tawh a, school chhia leh furniture siamthat a ni bawk a, hei hian naupang a hip a, naupang an pung a ni a ti. Tunah hian khaw hrang hrang atangin classroom indaih loh thu leh furniture siam belh ngai report a lo lut deuh reng a, hei hi zirna kawnga hmasawnnain a hrin chhuah a ni, a ti bawk.

Minister chuan sorkar sikul khar ngai tlu chhia awm loh nan tanlak a nih thu pawh sawiin, tunah chuan khar ngai a awm tawh lova, khaw hrang hrangin an sawi chu khar lam ni tawh lovin naupang kan leng tawh lo, furniture kan indaih tawh lo tih te a ni ta zawk a ni a ti a. Zirna hi kan ramah hian hmun pawimawh kan chantir a, chu chuan sorkar sikul a tithang a ni, a ti bawk.

Minister tawiawmtu H&FW Board Vice Chairman Dr. Z.R Thiamsanga pawhin thusawiin Covid-19 hripui karah sorkarin hmasawnna hrang hrang a thawk zel a, hripui leng dona kawngah leh zirna siamthat kawngahte pawh a theih ang angin hna a thawk zel a ni, a ti bawk.

Hnahlan Higher Secondary School a tlawhnaah hian Minister hi Pu C.Lalmuanpuia, MLA & Vice Chairman Veterinary, Fishery & Sericulture Board, Pu James Lalrinchhana, Director, School Education, Pu Lalhmachhuana SPD Samagra Shiksha leh District Officer dangten an tawiawm a ni.a