No.1322/2021-2022

Aizawl, the 9th July 2021 : Sawrkar Laipui ruahmannain vawiin khan Mizoram leh Assam ramri chungchangah Mizoram Chief Secretary Pu Lalnunmawia Chuaungo, IAS leh Assam Chief Secretary Pu Jishnu Barua, IAS te chu New Delhi ah an inbia.

Meeting ah hian Chief Secretary Pu Lalnunmawia Chuaungo chuan ramri hrulah hian harsatna awm lovin kum za chuang Mizoten lo neiin an lo enkawl tawh thin tih a sawi a. Mizoram Sawrkar leh Mizoram mipuite aiawhin Assam Sawrkar chu Vairengte ram chhunga Aitlang-a June ni 29, 2021 atanga Assam police inkulh mek te chu a rang thei ang bera hnuklet tur leh loneitute thlai leh thlam an tihchhiat te pawh zangna dawmna pe turin a ngen a ni.

Pu Lalnunmawia Chuaungo chuan Assam Sawrkar chu Mizo loneitute thlai leh bungruate tichhe tura Armed Police leh sawrkar official te an tirh tawh loh a beisei thu a sawi a. Hei hian Assam Chief Minister-in June ni 27, 2021-a Mizoram Chief Minister hnena lehkha a thawna State pahnihte inngeih taka an awm theih a beisei thu a ziah tihhlawhtlinna kawng pawimawh tak a nih thu sawiin police chakna hmang lova dawhkan kila ramri buai chungchang tha taka chinfel a pawimawh zawk thu a sawi. Assam Chief Minister-in June ni 29, 2021-a Mizoram Chief Minister telephone-a biain ramri buaina felfai taka chinfel theih a nih hma chu May ni 10, 2021-a Assam Chief Minister atana lakluh a nih laia ramri dinhmun ang (status quo)-a awm rih a duh thu a lo hrilh tawh a. Mizoram Chief Minister pawhin chu chu a duhdan a nih thu Assam Chief Minister lo hrilhin, hei hi state pahnih indawr chhunzawm zelna atana boruak tha siamtu a nih tur thu a sawi.

Chief Secretary pahnih te inbia hian inremna an nei thei lova. An inbiak hnua Union Home Secretary Ajay Kumar Bhalla, IAS hova meeting neih leh-ah pawh an ngaihdan leh duhdan a inmil theih loh avangin State Sawrkar thuneitu sang zawkte rawn ve ve a, hmalak zel dan tur ngaihtuah ni se tih a ni.

Vawiin inbiaknaah hian Mizoram Chief Secretary hi Mizoram DGP; Resident Commissioner, New Delhi; Pu Lalthiamsanga Sailo MPS, Joint Secretary, Home Department leh Pu Vanengkima, Scientist, MIRSAC ten an tawiawm a. Assam Chief Secretary hi an DGP leh officer dang pathumin an tawiawm bawk.