Vawiin chawhnu khan MIFCO Chairman thar Pu P.C. Zoram Sangliana chuan MIFCO officer te an office Canteen kualah kawmin hmalak ho dan tur a sawipui.

Mizoram sorkar enkawlna hnuaia din MIFCO (Mizoram Food & Allied Industries Corporation Ltd. ) Chairman atana ruat anih na ah a beisei loh lam thil ni mahse sorkar-in amah ringtawka an ruat anih ang ngeia sorkar hmanrua tha tak ni tura theihtawp chhuah a tum thu Pu Zoram sangliana chuan sawiin MIFCO chu hun engemaw lai atanga dinhmun rap pelh lek lek corporation chhe toh lam anihna ah miten an lo en hniam pawh a ni thei a, lei rem rap leh in Pathian leh sorkar zarah an dingchhuak leh thei a ni tiin harsatna an lo hmachhawn tawh atanga chhelna leh finna chherchhuak in Sorkar leh mipuite tana chhenfakawm ni thei zawk tura hmalak a ngai a ni a ti a. MIFCO atanga an hralh chhuah thin item hrang hrang ah te chuan a leiduh an awm chhung chuan hralhtur kan neih a ngai a ni tiin “Demand a awm phawt chuan supply theih kan tum zel tur a ni” a ti. Hotu hmasa Chairman kalta te atanga an hmachhawp leh thudah te a theih anga bawhzui a tum thu sawiin Officer te chu an thiam an finna te MIFCO hmasawnnan an ui lovang tih a beisei thu leh thu chhia thu tha ah pawh engmah hrilh hreh lo tura ngen in MIFCO Chairman chuan a hming ziak ah P.C. Zoram Sangliana tih chu a ziak thin dan anih avangin ngaihpawimawh sak hram tur leh hetianga ziak thin turin a ngen nghal bawk a ni.

Vawiin programme ah hian Pu Zosangliana, General Manager (Technical) in an dinhmun hrang hrang report a pe a, Pu L. Sanglura. Dy.Manager (A & PR) in report pe in an office harsatna te a thlen bawk. MIFCO hi dt.19th December 1989 khan Pu Liansuama Chairman na hnuaiah kalpui a lo ni tawh a, Pu Zoram sangliana hi Chairman 12 na a ni.Tunah hian Officer 15 leh thawktu dang 80 chuang an awm mek a, Secretariat Complex ah hmun ram nei tawh mahse building sak a la nih loh avangin Aizawl Canteen kualah miin luah in office an kai mek a ni. Zemabawk,Chhingchhip leh Sairang a an hmun atangin Sa leh thlai, thei leh thil dang dang hralh theih tura an sawngbawl te chu vawng tha in an zuar chhuak leh thin.Dawr dang pahnih Aizawl Millenium Centre-ah an hawng thar leh bawk a ni. Tunah hian MIFCO ah kum thum chhung atan Board of Directors 10 (sawm) sorkar-in a ruat thar a chungte chu : 1) Pu P.C. Zoram Sangliana, MLA – Director; 2) Commissioner/Secretary, Industries Department – Director; 3) Commissioner/Secretary, Finance Department – Director; 4) Secretary, Horticulture Department – Director; 5) Secretary, Agriculture Department – Director; 6) Dy. Adviser, Mizoram Planning Board – Director; 7) Director, Industries Department – Director; 8) Director, Horticulture Department – Director; 9) Secretary, NLUP Implementing Board – Director leh 10) Dr. Lalmalsawma, Kulikawn.