Vawiin ah khan Health Department hmalakna enfiah tura fehchhuak, Committee on Government Assurances-a MLA 3-te leh anmahni vengtute lambun an nih chungchangah Home Minister Pu R. Lalzirliana kaihhruaina in All Political Party Meeting koh a ni a. He meeting pawimawh tak ah hian Party tinte kim taka rawn tel theiin uluk leh ngunthluk taka sawiho a nih hnuah party tin lokal te chuan ni 28.03.2015 a thil thleng chu pawi tiin a mawhphurtu, leh a titu HPC(D) chu na taka demin Sawrkarin a hma thei ang bera HPC(D) hi dan pawn UNLAWFUL ORGANISATION’-a puan chu lungrual takin rem an ti.

All Political Party Meeting chuan MLA-3 te lambunna leh Police-3 ten nunna hlu tak an chan phahna, Zokhawthiang (Kani) dai inlambunna chungchanga mawhphurtua hriat HPC(D) Zosangbera pawlte chungah Mizoram Sawrkar chu a lungawilo hle a ni tih thu leh HPC(D) thiltih demawm an tih tak zet thu sawiin hemi chungchanga Sawrkar kal zel dan tur leh Sawrkar hmalak tawhnate an sawiho a ni.