Vawiin chawhma khan Govt Champhai College chuan 13th Mizoram University Sports Meet 2015 Football a an Champion lawmna hun an hmang a. He hun Govt Champhai College Multipurpose Hall-a neih hi Er. C Lalkima EE, PWD in khual zahawm niin a hmanpui.

Khualzahawm chuan thusawiin tuna zirlaite champion chu a tawpna ni loin a bul tanna nise a duh thu a sawi a. Pathian tiha inngaihtlawmna leh thuawihna nen eizawnnana hmang khawpa theihtawp chhuaha tan la zel turin a chah a. Tunlai khawvel changkanna in a ken tel Media chi hrang hrang Facebook leh Whatsapp te chu tangkai taka hmanthiam turin leh thu vawrh darh satliah mai mai nan hmang lo turin a chah a. Champhai a chhiat chuan Mizoram a mawi thei lo tih kan hre reng turin leh, Lehkhazir mi leh inkhel mi chuan mahni tumna kawngah hlawhtlin tumin rilru thar pu theuh turin kalkhawmte a chah a ni.

Vawiin hun hi Pu Lalsangthanga Asaociate Professor In a kaihruai a. Pi C Lalnunpuii, Associate Professor-in technical report a pe a, Pu Lalnunmawia Principal leh Lalchawiliana, SU Vice President ten thusawiin, Pu H Hmingthanzauva Associate Professor in lawmthu sawiin he hun hi a khar a ni.