2057/2022-2023 

Tunhnaiah Mizoramah Dengue natna a hluar mek zel a, Dengue natna hi natna dangte angin kan la hmelhriat tawk lo hle. Natna pung chak tak anih avang hian inven kawngah tan kan lak zual a tul hle a ni. He natna chungchanga mipuite hriattur pawimawh zual te chu:


1.  Dengue hi natna chi khat virus in a thlen a ni a. He natna hrik (virus) hi thosi in a pu darh thin a, chuvangin thosi seh atanga inkaichhawn theih a ni. Dengue natna thehdarhtu thosi hi thosi chi khat Aedes aegypti (a dum leh a var tial rik rek), mizoten thosi rang kan tih hi a ni. Aedes thosi te hian vawi khat Dengue hrik a pai tawh chuan a damchhungin a pai reng a, a seh apiang ten Dengue natna an kai thin. Malaria thlentu thosi te anglo takin Aedes thosi te hian chhun khaw en laiin mi an seh deuh ber thin. Dengue hi chi hnih (2) a then niin, chungte chu: a)Dengue Fever leh b)Dengue Haemorrhagic Fever (DHF)


 2.Aedes thosi te hian an tui (egg) ah dengue natna (DEN-virus) an thlahchhawng (transovarian transmission) thei a. Thosi tui (eggs) te hi tui tel lovin reitak a dam thei (dessication) bawk avangin thosi inthlahpung zel tur vennan in leh avel tui tlin theihna tih bo thin tur a ni. 


3.Aedes thosi in mihring a seh atanga ni 5 – 6 chhungin natna a langchhuak thin.


4.Dengue Fever lanchhuah dan te chu khawsik sang tak, lu leh chalbawr na, mitmu na leh khaw enga mit men harsa, ruh leh tihrawl na, taksa a bawl/vual sen awm te anni. 


5.Dengue Haemorrhagic Fever (DHF) lanchhuah dan te chu hnar, ka leh ha hni atanga thichhuak, luak, pumna tak leh nak dinglam na. 

6.Dengue fever hi natna dangte ang loin enkawlna bik damdawi a awmlo a, a natna lanchhuah dan (symptomatic treatment) ang zela enkawlna hi pek tur a ni.  

7.Dengue nih leh nihloh finfiah (exam) theihna khawl ELISA hi Sentinel Surveillance Hospital (SSH); Aizawl Civil Hospital leh Lunglei Civil Hospital ah te a awm a. SSH pan remchang ve theilo te tan District Hospital, PHC/CHC/SDH/UPHC tin ah te hian thisen sample lain SSH a exam turin an thawn sak thei a ni.   

8.Denge natna leh thosi in a thlen theih natna dangte laka invenna hrang hrang heng thosilen zar, mahni in leh a vela thosi inthlahpun theihna tuitling siamlo tur a kar tin in leh a vel tihfai, thosi inseh tir lo tur a thawmhnaw taksa khuh tam thei inbel, thosi thahna hlo hrang hrang heng chhit chi, hal chi leh hnawih chi hman te, mahni inchhung DDTkah tir te leh tuizem leh tui dahkhawlna phui taka  chhin te hi ngaihpawimawh theuh tur a ni. 

9.Dengue natna leh natna dangte laka mipui te kan him nan Health Department chuan theihtawp chhuahin hma a la mek zel a, mipuite chi ai mai lovin mahni invenna kawnga tan lo la zual zawk tura ngen an ni. Dengue natna laka inveng tur hian mitin in mawhphurhna kan nei a, heng inven dan kawng hrang hrang te hi zawm theuh turin kan in ngen a ni. Tin, natna lanchhuah dan tarlan te anga kan awm anih chuan damdawiin pan vat nachang hre tura ngen kan ni.