648/2024-2025

Champhai, the 3rd June, 2024: Vawiin chawhma dar 11:00 khan Pu James Lalrinchhana, District Election Officer (DEO) & Assistant Returning Officer (ARO) chuan Champhai District chhunga Chanchinbumite DC Conference Hall-ah kawmin Lok Sabha Inthlanpui, 2024 a vote tlate chhiar tura inpuahchahna leh hriattur pawimawhte a hrilhfiah a, vote chhiar tura Champhai District a inpeih tawh thu a sawi.

Pu James Lalrinchhana chuan District hmalaknate thahnemmgai taka Chanchinbumite'n an puanzar thin avangin lawmthu a sawi a. Mipui hnena palai hna thawktute nena vote chhiar chungchanga hriattur pawimawhte inhrilhhriatna hun hman a ni chu lawmawm a tih thu sawiin, boruak muanawm tak hnuaiah vote chhiar a beisei thu a sawi a. Inthlan kaihhnawih hmalakna hrang hrang mipui hnena puanzar kawnga Chanchinbumite tawiawmnaah District Election Office hmingin lawmthu a sawi a, counting day leh nakin zel atan an tawiawmna leh thlawpna a ngen nghal bawk.

SP Champhai Pu Vineet Kumar chuan venhimna chungchanga ruahmanna duante sawifiahin boruak muanawm tak hnuaiah vote chhiar a beisei thu a sawi a. Dan phal loh hmalakna ven kawngah theihtawp chhuah a nih dawn thu a sawi a. Lirthei chetvelnaah harsatna a thlen loh nan ruahmanna siam a nih thu sawiin, mipuite zawm theuh turin a sawm a. Security duty turte bakah thlaveng thlenga ruahmanna siam a nih thu a sawi bawk.

Pu Lalrinawma, ARO, 25- East Tuipui Assembly Segment-in counting day plan a sawifiah a. Zing dar 5 ah final randomization neih a nih dawn thu leh zing dar 8 atangin vote chhiar tan tum a nih thu a sawi a. Postal Ballot chhiar a nih dawn loh thu leh EVM Control Unit-a vote tlate chhiar nghal tur a nih thu a sawi a. Heng bakah chuan Polling Station 5 pawhfuha VVPAT paper slip-te chhiar tel tur a nih thu a sawi bawk.

He huna tarlan a nih dan chuan Champhai District-ah Asembly Segment (AS) 3 awmin, 24-Champhai South (ST) AS atan Assistant Returning Officer (ARO) atan Champhai District pumpui atana ARO nisa Pu James Lalrinchhana, District Election Officer chu ruat a ni a; a ni bakah hian ARO pahnih 23-Champhai North (ST) AS atan Pu K. Zorammuana, Dy. District Election Officer leh 25-East Tuipui (ST) AS atan Pu Lalrinawma, PD, DRDO te ruat an ni a, anmahni pui tur hian Assistant to ARO pakhat theuh ruat an ni bawk a. Champhai District chhunga vote chhiar dan endik turin ECI chuan Counting Observer atan Pu Souvik Banerjee, SCS (WB 2002) chu a ruat bawk.

DC Office chu Counting Centre atan ruat niin, Counting Centre-ah hian Counting Hall 3 hetiang hian siam a ni:-

1) 23-Champhai North (ST) AS atan General Room, DC Office.

2) 24-Champhai South (ST) AS atan DEOC Building, DC Office.

3) 25-East Tuipui (ST) AS atan Election Room No. II, DC Office.

Counting Centre leh Hall tinah hian CCTV vuah vek a ni a. Counting Hall tinah hian counting table 8 theuh siam a ni a, heng zinga pakhat hi VVPAT chhiarna tur VVPAT Counting Booth (VCB) niin, vote tlate hi round 4 ah chhiar zawhfel a ni ang. Counting Table tinah Counting Supervisor, Counting Assistant leh Counting Micro-Observer pahkhat zel, an vain mi 3 zel an awm ang.

Vote chhiar tur hian Counting Supervisor 30, Counting Assistant 30 leh Counting Micro-Observer 32 te ruat an ni a. First randomization neih tawh niin, vawiin tlai hian Counting Observer hovin second randomization neih a ni ang a, naktuk zing dar 5:00 ah vote chhiarna tur dawhkan siamfela hriattir an ni ang. Assembly segment tinah hian reserve team 2 zel an awm dawn a, VVPAT Slip an chhiar ang. Vote chhiar ni hian Presiding Officer zawng zawngte pawh vote tla chungchang a thil felhlel engemaw zawhfiah duh a awm pawha zawhfiah mai theih turin koh tel vek an ni.

Venhim hna thawk turin security arrangement thuah thuma kalpui leh tur a ni a, a chhung ril berah CRPF awmin strong room bul leh EVM chetvelnate an veng dawn a, a laiah State Armed Police Force (SAPF) awmin Counting Centre,  main gate an veng ang a, a pawn berah Mizoram Police duty-in Counting Centre panna kawng SDO (S) qrts. leh NIC building bul waiting shed zawnahte demarcation area chhinchhiahna siamin an duty ang. DC Office, Superintendent Room chu Media Centre atan buatsaih a ni a, Media Centre atang hian round-wise result-te puanzar nghal zel a ni ang.

Counting kaihhnawih hrang hrang Counting Official, Staff, Security personnel leh ENCORE training-te tha taka zawhfel a ni a. NIC building bul waiting shed zawnah leh SDO (S) qrts. bulahte demarcation area chhinchhiahna siam a ni anga, lirthei luh tlang phal a ni lo ang. Parking area atan DRDO office tualzawl leh Addl. DC qrts. thlang tualzawlte ruahman a ni. Result hi round tin puan a ni anga, result zawng zawng hi RO, 1-Mizoram (ST) PC, Aizawl, Mizoram leh CEO Office lamahte thehluh zel a ni dawn a, final result hi RO atangin puan a ni ang. Counting Hall tinah round-wise result chu screen liana tarlan tum a ni bawk.