Returning Officer leh Aizawl District Election Officer ni bawk Pi Juhi Mukherjee chuan vawiin chawhma dar 11:00 khan ama office chamber ah thu thar theh darhtu te (media) a kawm a, Lok Sabha inthlanna tura inpuahchah dan te sawifiahin media laka ECI-in a beiseina te a hrilhfiah.

Inthlanna tluang taka neih a nih theih nan election-a duty tur Polling Officials leh Booth Level Officers te tan training pawh kalpui chhoh mek a nih thu leh Expenditure Monitoring Team leh Candidate Agent te tan pawh training buatsaih a nih thu DEO chuan a sawifiah a. Inthlanna hman tur EVM leh VVPAT endik hna pawh thawh chhoh mek a nih thu a hrilh bawk. Mizorama MP inthlanna vil tura ECI-in General Observer 3 - Dr Rakesh Gupta, IAS (Aizawl, Mamit leh Kolasib District), Pu Saleem Mohammad, IAS (Champhai & Serchhip District) leh Pu Hemaji Naik, IAS (Lunglei, Lawngtlai leh Saiha District) a ruat thu leh Expenditure Observer 3 - Pu P.C.Majhi, IA&AS (Aizawl District), Pu A.Pitoho Chophy, IA&AS (Mamit, Kolasib, Champhai & Serchhip District) leh Pu Lhunkhothang Hangshing, IA&AS (Lunglei, Lawngtlai & Saiha District) ruat an nih thu a tarlang bawk. Pi Juhi Mukherjee chuan EVM lo dawnsawnna tur Receiving Counter leh Strong Room atan Assembly Annexe hman a nih tur thu a sawi lang a, Counting Hall atan Assembly Annexe basement hman tum ni bawkin room zau zawkah Counting Hall pawh tam zawk buatsaih tum niin EVM/Polling Party dawnsawn leh vote chhiar hna pawh a tihawlsam ngei beisei a nih thu a sawifiah bawk.

DEO chuan inthlannaa media pawimawh zia sawiin inthlan laia diklo taka sum hman venna leh Model Code of Conduct (MCC) kenkawh kawngah media te chu hmanraw tangkai an nih thu a hrilh a, journalist zahawm leh puitling an nih anga mipui tana rintlak ni tura candidate leh political party awn lam bik nei lova neutral tak leh rualkhai taka candidate/party chanchin ziak thin turin a ngen. Model Code of Conduct-in a sawi angin mimal insawichhiatna emaw, hnam, chi leh sakhua inkara buaina chawk chhuak thei zawng thu ziak lo tura inveng fimkhur turin media te chu a chah a, inthlanna thianghlim leh felfai taka neih a nih theih nan MCC chu tha taka zawma, MCC bawhchhiatna an hriat apiang chu a hnenah thlen zel turin a ngen bawk. Media-in mipui rilru nasa taka a kaihhruai theih avangin ECI ruahmanna angin diklo tak leh sum/therhlo hmanga Candidate / Political Party ten hma an lak ven nan Print leh Electronic Media-a inthlan kaihhnawih thil tihchhuah reng reng vil turin District tinah Media Certification & Monitoring Committee (MCMC) din a ni a, electronic media (cable TV, radio etc) kaltlanga political advertisement tih chhuah tur reng reng chu a dilna form hmangin MCMC ah Certification dil hmasak vek tur a ni. Social media website te pawh ECI chuan electronic media-ah ngaiin MCMC Certification hi dil hmasak zel tur a ni bawk a, henga sum senso te hi candidate campaign senso ah belh tel vek tur a ni. Chanchinbu-a political advertisement tih chhuah tur chu MCMC certification dil a ngai lo va, amaherawhchu MCC bawhchhiatna awm lo turin fimkhur taka tih tur a ni. Chanchinbu-a political advertisement tihchhuah reng reng te chu advertisement a ni tih chiang takin ziah thin tur a ni.

Mizoram ah a tlangpuiin MLA inthlan aiin MP inthlanna ah vote tla a hniam zawk thin a, DEO Pi Juhi Mukherjee chuan ram hruaitu inthlannaa vote thlak chu khua leh tui kan nih anga kan mawhphurhna pawimawh tak a ni tih hriaa vote thlak theuh turin mitin a sawm bawk a ni.