3856/2024-2025

Dated Serchhip, the 17^th January, 2025: Vawiin khan Serchhip DC Pu Paul L Khuma, District Election Officer ni bawk kaihhruaiin Serchhip District-a Village Council inthlanpui lo awm tur atana inbuatsaihna leh model code of conduct chungchang inhrilhfiahna hun Serchhip DC Meeting Hall-ah neih a ni.

Pu Paul L Khuma chuan Serchhip District mipuite tawiawmna avangin tluang leh felfai takin inthlanna neih a lo ni tawh thin a, tun tum Village Council inthlanpui lo awm tur pawh harsatna awm loa hmachhawn theih an inbeisei thu a sawi a. Serchhip District ah Village Council 54 awm thin chu pahnihah pun belhin Village Council 56 ah inthlanna neih a ni ang, DC chuan a ti. Returning Officer ruat fel tawh niin training vawikhatna niminah buatsaih a ni tawh tih a sawi a. Presiding Officer leh Polling Officer te pawh khaw chhunga sawrkar hnathawkte ruat an ni dawn tih sawiin, heng mite tan hian training vawi thum buatsaih tum a ni, a ti.  Kumin inthlanah hian a vawikhatna atan Common Election Camp siam a ni dawn tih Pu Paul L Khuma chuan a sawi a. Party Worker te inkara boruak tha lo pumpelhna atana duan niin Polling Station bulah party tin te leh candidate te awmkhawmna tura siam a nih tur thu leh party symbol, flag, thuziak te kenluh phal a ni dawn lo tih a sawi bawk. District Election Officer chuan election felfai leh thianghlim taka zawhfel a nih theihna tur leh vote nei zawng zawngin vote an thlak theuh theihna turin political party te leh mipuite thawhhopuiah a sawm a. Model Code of Conduct hman mek a nih avangin inkaihhruaina zawm theuh turin party mi te leh mipuite a ngen a ni.

Additional SP Pu Saidingliana Sailo pawhin venhimna lama ruahmanna an siamte a sawi a. Serchhip District hi Zone 4 ah leh Sector 7 ah an then a. Polling Station a harsatna a awm a, a hmuna awm ten an chinfel theihloh buaina a thlen thulha tlan nghal thei tur Quick Response Team 5 an din bawk a ni. Additional SP chuan harsatna leh buaina awm lovin felfai leh thianghlim taka inthlan hmachhawn thei turin an inbuatsaih tih meeting-ah hian a sawi a ni.

Election Officer Pi F Lalnisai chuan Model Code of Conduct chungchang a sawifiah a. Inthlan puan ni atanga result puan thlenga hman tur a nih thu leh hemi chungchanga hriat duh emaw, MCC bawhchhiatna chungchanga complain thehlut duh te tan DEO/District Magistrate hnenah emaw Nodal Officer Additional DC Pu Lalrinzuala hnenah emaw, a tul chuan mahni bialtu Sector Officer/ Sector Magistrate te hnenah thlen theih a nih thu a sawi.

Serchhip District ah Voters 50443 an awm mek a, mipa 1000 zelah hmeichhia 1063 awmin voters hmeichhia an tam zawk a ni. Chhungkua (household) awm zat hi 14762 a ni a, Village Council General Seat 188 leh Reserved seat 66, belhkhawmin seat 254 chu candidate ten an inchuh dawn a ni.

Vawiin meeting-ah hian General Election to Village Councils, 2025 inthlan lo awm tur atana Nodal Officer te, Sector Officer te, Political Party hruaitute, MJA te leh Serchhip District MPF hruaitute an tel a ni.