District thenkhatah Horticulture Department hnuaia Serthlum trade thlangtuten Serthlum chi tha, Horticulture Department-in pek tura a ruahman dawng duh lo beneficiary engmaw zat an awm a ni tih NLUP Implementing Board ah report dawn a ni a. Hemi chungchangah hian vawiin khan NIB hotu te, Horticulture Department a hotu pawimawhte leh NLUP Non-Official member-te thukhawmin ngun takin hemi chungchang hi a ngaihtuah a. Kumin 2nd Phase NLUP beneficiaries te hnena Serthlum chi sem mek hi Horticulture Department chuan nursery hrang hranga Serthlum chi te uluk takin a enfiah hnuah, tha tawk a ngaihte chauh sem chhuah turin ruahmanna a siam a. He ruahmanna hi NLUP Implementing Board leh NLUP Apex Board chuan tha tawkah ngaiin a lo pawmpui tawh a ni.

NLUP 2nd Phase hnuaia Serthlum trade thlangtu zawng zawngte chuan he ruahmanna ang hian Horticulture Department hnen atangin Serthlum tiak hi an dawng ang a, an phun ngei bawk tur a ni. NLUP Implementing Board leh Horticulture Department ruahmanna anga sethlum phun lo te chu NLUP atanga tanpuina pek chhunzawm theih an ni tawh lovang. Ruahmanna anga hmala lo te chu an sum lo dawn tawh pawh a tul anga rulh tir leh a ni bawk ang.

NLUP hnuaia Serthlum Trade thlangtu zawng zawngten he thutlukna hi ngai pawimawh a, Horticulture Department ruahmanna anga Serthlum tiak phun theuh turin NLUP Implementing Board chuan a ngen a ni.