Sawrkar Laipuiin mipui rawngbawlna kawnga a hnathawh tehna atana a hmanraw duan – Results Framework Document (RFD) chu Mizoram Sawrkar hnuaia Department 40 thlanchhuahten kumin March thla atang khan an buaipui tan a. Department hrang hrang te RFD lo duan tawh chu peihfel a ni tawh a, heng Draft te hi Central lama hemi chungchanga thuneihna Committee sang – Adhoc Task Force (ATF) on RFD te chuan vawiin leh natukah Administrative Training Institute-ah an thlir ho dawn a ni.

Department hrang hrangte Draft duan hi vawiin khan Central Adhoc Task Force on RFD chuan a Department mal mal hotu lute nen Administrative Training Institute-ah an thlirho a, siamthat ngai awm ni a an hriat te an sawipui. Vawiina Central Adhoc Task Force Member rawn kal te hi mi 20 vel niin an zinga tam zawk chu Sawrkar Laipui a Secretary pension tawh te leh RFD chungchanga thiamna leh tawnhriat neite an ni.

Mizorama RFD hman hi Council of Ministers-in August, 2012 khan an lo rel tawh a. Results Framework Document (RFD) chu sawrkar kum 2013-2014 chhung hian Department 40 thlanchhuahte hnathawh that dan (performance) enna atan hman tum a ni.

RFD hi sawrkar laipui chuan kum 2009 – 2010 atang khan a kalpui tan tawh a, tunah hian a hnuaia Ministry 79 ah te kalpui mek a ni a. Kumin May thla tawp thleng khan Mizoram tiamin state 13 ten RFD hi an kalpui tan tawh a, state thenkhatte hman ve turin hma lak mek a ni a. Hmarchhakah chuan Assam in an tan hmasa ber a, Mizoram leh Tripura in kan dawt a ni.