428/2026-2027

Dated Aizawl, 8th May, 2026 : Vawiin khan sawrkar laipui hnuaia Department for Promotion of Industry and Internal Trade (DPIIT) leh Mizoram sawrkar hnuaia Department of Commerce & Industries tangkawp chuan UNNATI Scheme in a tum te inzirtirna leh inhrilhfiahna hun Royale Lalawi Hotel Conference Hall, Khatla ah an buatsaih a, Commerce & Industries minister Pu F. Rodingliana chuan khuallian niin a hmanpui.

He hunah hian minister Pu F. Rodingliana chuan thu sawiin hun rei tak chhung kan ram leilungin a zir tawk loh avangin investors ten rawn luh an hreh thin a, chu harsatna chu KMMTTP in a rawn thlak danglam mek a ni a ti a, international border thui tak kan neih te hi a hlutna hre tur leh hemi behchhan hian UNNATI Scheme hmang tangkai thiama, investors tam zawk hip lut thei tura tan la zual zel turin kal khawm te a chah a. UNNATI Scheme hnuaia inziak lut an tlem lutuk chu pawi a tih thu sawi langin, sawrkar laipui lama thuneitute pawhin awlsam zawka inziah luh a, mi tam zawkin he scheme hi an hman tangkai ngei theih nan a process ti awlsam se a duh thu a sawi bawk a ni. Minister hian UNNATI Registration Certificate sem nghalin, an registration approved tawh mi pasarih hnenah UNNATI registration certificate hi a hlan a ni.

DPIIT Director Pu Rajesh Panwar pawhin thu sawiin, Mizorama investor-te leh entrepreneur-te tana an inhawn thu leh zawhna leh harsatna an neih apiangte chu chinfelsak an inhuam thu a sawi a. UNNATI Scheme in a cover lo a nih pawhin sawrkar scheme hrang hrangte zirchiang a, hamthatna an dawn theih te hre tura hma la thin turin kalkhawmte a chah bawk a ni.

Pu Lalrinawma, Joint Director, Department of Commerce, Industries, Geology & Mining chuan kalkhawmte hnenah Mizoramin industry lama hmasawn zel tura theihna a neih te tarlangin, Mizoram chu India ram tan South East Asia kalkawng pawimawh tak a ni mek a, Consumption Economy atanga Production and Exporting Economy a kan inleh chho mek thu leh, Mizoram sawrkar investment policy hrang hrang te kan hman tangkai chuan nasa taka hma kan sawn ngei a beisei thu a sawi bawk a ni.

Pu Karampaul Singh, Nodal Officer, DPIIT chuan UNNATI SCHEME nihphung chu kalkhawmte hmaah tarlangin, he scheme hnuaia Mizoram dinhmun a sawifiah a, Mizoram chu North-East State dangte aia an pawisa dawn theih a tam zawk thu sawiin Mizoram tan vaibelchhe 453 lai dah a nih thu leh, mi pasarih chiahin registration an la ti chu a pawi a tih thu a sawi a, application 26 chauh Mizoram atang an la dawn thu a sawi a. Mizoram chu Zone – B, hlawkna tam zawk tel theihna zone a awm an nihna te chu hria a, tun aia nasa zawka scheme hi hmang tangkai turin kalkhawmte a chah a. Kalkhawmte hnen atangin an hriat duh ang te leh an harsatna neihte zawhna leh chhanna hun hman a ni bawk.

Pu Zorema Darkim UNNATI Project Implementing Unit chuan  kalkhawmte hnenah lawmthu sawiin hun hi a khar a ni.