Chief Minister chuan department-a thawktu tam, inthlahdah leh hnathawk thiam lo hian awmzia an neilo a, hnathawktu tlemte, hna thiam leh hnaa tui te hi sorkar tan an tangkai zawk a ni tiin, chutiang department chu in ni a ti a. Ram hmasawnna tehfung chu statistics hi a ni a ti a. Statistical data dik hian planning tha a siam a, chu chuan sorkar tha a siam thin a ni a ti. Sum lama inrelbawlna tha nei tur chuan statistical data dik bawk a pawimawh a ni tiin, chumi hnathawktu chu in ni a ti a. Chuvangin statistical data hi hmasawnna lungphum hmasa ber leh pawimawh ber pakhat a ni a ti.

Pu Lal Thanhawla chuan data te hi zirchianin hmasawn dan tur a ruahman lawk theih a ni a ti a. Chuvangin central sorkara sum haichhuah tur tam tak awm te hi Detailed Project Report (DPR) dik leh pawmpui tlak siam turin statistical data te hi uluk taka kan zirchian a ngai a ni a ti. Chief Minister chuan ringtu kan nih angin kan hna theuhah kan tui tur a ni a ti a. Refresher Course nei tur statistics mite chu an thawhna department len leh tet ngaihtuah lova an pawimawhna hre zawk tura chahin, intuaitharna an neih tur chuan an hriatna leh thiamna tibelhchhahtu ni turin leh thawhhona tha thlentu ni turin duhsakna a hlan a ni.

Refresher Course hawnna hi Pu Ngunlala, Director, Economics & Statistics in a kaihruai a, chawhnu lamah technical session-in chhunzawm a ni.

Chief Minister hian Ch. Chhunga Bus Terminal-a office nei Aizawl Municipal Council chu tlawh nghalin AMC Chairman Pu C.T. Zakhuma leh Vice Chairman Pu Zarzoliana leh Councillor thenkhatin lo hmuakin pangpar an lo hlan a. Chairman pisa-ah inkawmna neiin hun tha tak leh hlimawm tak an hmang tlang a. Pu Hawla chuan thu sawiin Municipal Council hi kan ramah thil thar a la ni a, zir chawp zela kal kan ni a, tihsual leh tih dikloh palhte a awm thei a ti a. A neitu vek kan ni tiin inhrethiam taka thawkho turin a sawm a. In ral ep mai lo a, infinchhuah zela zirho tlang zel turin a sawm a ni.

Chief Minister chuan Municipal Council chu a nihna ang taka hna a thawh tan theih nan hna pek belh dan leh an mamawhte ngaihtuah sak a duhthu sawiin, sum duh anga hman tur a awm mai zel loh thute hriatpui tura a duh thu a sawi a. A tul ang chu Minister leh official-te nen sawiho a hmalak dan ngaihtuah a tum thu a sawi bawk a ni.

Pu Hawla hian AMC Session hall te, conference hall te leh room dang dang a fang a tih changtlun tul a tih thu leh a duh thu a sawi bawk a ni.