2582/2026-2027

New Delhi, the 8th October, 2026 : Ni 2 chhung awh tur Ministry of Women & Child Development Department, Government of India buatsaih Departmental summit on Women & Child Development chu vawiin khan Sushma Swaraj Bhavan, New Delhi-ah neih a ni a. He hunah hian Mizoram aiawhin WCD Minister Pi Lalrinpuii a tel a ni.

He Summit hi sawrkar laipuia Ministry of Women & Child Development ten naupang tana chaw tha leh an himna tur te, hmeichhiate himna leh chawikanna chungchangah te centre leh state sawrkarin thawhhona tha zawk an neih theihna tur atana buatsaih a ni a. Vikshit Bharat 2047 hlawhtlinna tur atana kawng hrang hranga hmeichhiate leh naupangte humhalh a, dawmkan dan tur leh anganwadi-a early childhood care and education changtlung zawka kalpui theih dan turte an sawiho a ni.

He hunah hian Pi Lalrinpuii chuan state hrang hrang atanga WCD Minister leh Senior Official te hmaah Mizoram Sawrkar hnuaia WCD Department te hmalakna tha bik hrang hrang sawiin, Mission Vatsalya hnuaia portal leh Digital case management chungchangah presentation a pe a. He presentation-ah hian Minister chuan naupang venhim ngaite chungchangah Portal kan neih tak avanga chak leh tha zawka hmalak a nih tak dan te, pending case neilo tura chak taka hmalak a nih dan te, community participation tha zawk nei thei tura kawng hrang hranga hma an lak dan te a sawi a; Child Helpline, CPIMMS Portal leh Digital UNCRC and legal rights dissemination chungchanga hmalakna thazual te a sawi bawk. Tunlai khawvel changkang zel milin sawrkar hmalakna kawng engkimah Data Driven Governance kan mamawh tawh dan te he hunah hian a sawi bawk.

He Summit-ah hian Union Minister for Women & Child Development Pi Annpurna Devi te, Union Minister of State Pi Savitri Thakur te, Delhi Chief Minister Pi Rekha Gupta te bakah State hrang hranga WCD Minister te leh Senior Official te an tel a. Ni hnih chhung sawihona hrang hrang an neih hnuah naktuk tlaiah he summit kharna hun hi Prime Minister Pu Narendra Modi hoin neih a ni ang.

Mizoram atangin Pi Lalzarmawii, IAS, Commissioner & Secretary, Women & Child Development Department leh Pu H. Lalhruaitluanga, PS to Minister te chuan Pi Lalrinpuii hi an tawiawm a ni.