2581/2026-2027

Aizawl, October 8, 2026: Vawiin khan PHE Minister Prof. Lalnilawma chuan ni hnih chhûng awh tur National Seminar “Youth and Culture in Northeast India: Intersections and Perspectives” chu a hawng a, he Seminar hi Govt. Aizawl North College (GANC), Mizoram leh Christ University, Bengaluru te tangkawp buatsaih a ni.

He hunah hian Prof. Lalnilawma chuan thu a sawi a, Northeast India chu India rama hmun pawimawh tak luahtu a nih mai bakah India ram hmasawnna thlen theitu a ni, a ti. Northeast state-ah chuan tawng chi hrang hrang hmangtu hnam hrang hrang te an awm a, heng hnam kara inunauna tha tak awm thin hi a tihlu zualtu a ni tih a sawi bawk.

Minister chuan Seminar thupui “Youth & Culture” chu tunlai khawvel nena inrem tak a nih thu a sawi a, thalaite chuan music, fashion, literature, social media leh khawtlang nun hmangin culture an siam danglam mek zel a ni, a ti. Hmanlai nunphung leh tunlai nunphung inlaichîn dan leh danglam dan te chu hriatthiam a pawimawh tih sawiin, technology lama hmasawnna leh social media te hian thalaite nunah nghawng nasa tak an nei tih a sawi. Minister chuan culture leh hnam nihna (identity) humhalh chunga tunlai khawvel hmasawnna kalpui thiam turin kalkhawmte chu a chah a ni.

Prof. Lalnilawma chuan social media leh Artificial Intelligence (AI) chungchang sawiin, AI chu kawng tam takah tangkai hle mah se a hman sual theihna kawnga fimkhur turin kalkhawmte chu a chah a, thu dik lo thehdarh kawngah te fimkhur tlan a pawimawh a ni, a ti. He seminar hi hmun hrang hrang atanga zir mi “researcher” te inhmuhkhawmna hun pawimawh tak a ni, a ti a, a hlawhtlinna erawh chu zirlaite rilru sukthlek a nghawng danah a innghat thui hle a ni, a ti. Minister chuan chuan Seminar buatsaihtute leh a hlawhtlin theih nana tha leh zung sengtu zawng zawngte chungah lawmthu a sawi a, seminar hlawhtling tak an neih theih nan kalkhawmte chu a duhsakna a hlan a, Northeast India culture leh hnam nunphung humhalhtu leh a tha zawnga danglamna thlentu ni thei tura theih tawp chhuah turin a chah a ni.

GCU Assam Vice-Chancellor Prof. Kandarpa Das pawhin thu sawiin, Northeast India-ah chuan hnam hrang hrangte culture hmuh tur a awm tih a sawi a, thalai zawkten tunlai khawvel hmasawnna karah he culture hi an chhawm nung zel turin mawhphurhna an nei a ni, a ti. Zirna inah te culture chungchang inzirtir tam a, khawtlanga kan mawhphurhnate kan inhrilhhriat tam a pawimawh hle tih sawiin, zirlai kalkhawmte chu seminar hlawkthlak tak nei turin a duhsakna a hlan a ni.

Pi Mitra Phukan, Author, Columnist leh Translator chuan Northeast India culture humhalh leh chhawm nun kawngah thalaite an pawimawh hle tih a sawi a, Culture chu thil inthlak reng ni mah se a tobul chu a danglam ngai lo, a ti. Thlalaite chuan digital media, music, literature, fashion leh tourism hmangin Northeast India culture hrang hrangte chu mipuite hnenah an puangzar thei a ni, a ti a, culture hrang hrangte inhriatpawh tawnna chuan inlaichinna tha zawk a chhuah dawn a ni tih a sawi bawk.

Seminar hawnna inkhawmah hian Government Aizawl North College Principal Dr. Saroj Laldinpuii chuan inlawmna thu a sawi a. Panel discussion neih niin, panelist-te chu Pu F. Vanlalrochana, MPS leh writer, Pi Bidisha Mahanta, Executive Director, Zubaan leh Dr. Kedilezo Kikhi, Professor, Department of Sociology, North-Eastern Hill University (NEHU) te an ni. Research paper present-na tur parallel session-te pawh neih a ni. He ni hnih awh Seminar-ah hian Northeast India-a thalaite culture danglam chho mek chu discipline hrang hrangte hmanga zirchianna hun neih a ni ang.  Naktuk October ni 9, 2026 hian seminar kharna hun hman a ni ang a, LESDE Minister Pu Lalnghinglova Hmar in hun a hmanpui dawn a ni.