1598/2022-2023
Dated Khawzawl, 15th August, 2022 : Vawiin chawhma dar 9:30 khan Mualvawm field, Khawzawlah India Independence Day vawi 76-na ropui taka lawm a ni a, Deputy Chief Minister Pu Tawnluia'n khuallian niin a hmanpui.

Khuallian Deputy Chief Minister hian Independence Day lawmna hmun a thlen veleh hian India hnam puanzar pawt pharhin parade contingent 14-in zahna chibai an hlan a chhanglet a, Independence Day thuchah a sawi chhunzawm a ni.

He ni lawmnaah hian khuallian chuan Khawzawl district mipuite leh ram puma India khua leh tuite duhsakna chibai a buk a, India ram chuan Independence a hmuh kum 75-na a lawm mekna programme ‘Azadi Ka Amrit Mahotsav’ hnuaia sorkar hmalakna te hian Khawzawl district hi intodelh leh mahni ke a ding thei turin tanlakna chang hriattirtu ni thei se a duh hle tih a sawi.

Kum kalta chhunga Mizoram sawrkar hnathawh leh hmalakna lian zual thenkhat tarlangin khuallian chuan Special Assistance to States for Capital Expenditure scheme hnuaiah hmasawna ruhrel hna lian tak tak Kawng, Kawlphetha leh Tui connection mai bakah Hriselna leh Khawpui Infrastructure, a bikin bawlhhlawh sawngbawlna atan hna thawh mek a ni a. Kum 2022 atan pawh Mizoram huap in hmasawnna hna lian leh tangkai thawh tum leh mek a ni, a ti a. Sawrkar laipuiin State tin te Central Scheme pawisa a release dan kalphung a thlak avangin CSS pawisa Crore 600 chuang zet Mizoram Sawrkar in tun hnaiah a pechhuak a. Hei hian sum leng vak a ti tamin kan ram economic activities a tih kal chak mai bakah development hnathawh a ti kal chak dawn a, thu lawmawm tak a ni a, Mizoram sawrkar pawh a hnathawkte hlawh leh state fund bik te pawh a hma aiin kan in manage fuh tawh dawn niin a lang a, kan insiamrem hret hret zel a ni, a ti.

Pu Tawnluia chuan Jal Jeevan Mission hnuaiah In tin in tui connection kan nei theih nan solar project leh gravity tui lakna project za tel thawh mek a ni a, heng project hrang hrang te hi zawh thuai tum a ni, a ti a. AMRUT 2.0 kaltlangin khawpui 23-ah tui connection pek thar tum a nih mai bakah SBM 2.0 hmangin bawlhhlawh uluk zawka sawngbawlna tur ruahmanna siam a ni, a ti bawk.

NESIDS kaltlangin Kolasib Hospital Sakna tur in buatsaih mek a nih thu sawiin, Aizawl Khawpui leh a chhehvel khuate chawmna tur Alternate Gravity Water Supply Scheme thawh mek a nih thu a sawi a. Mizoram a Medical College awmchhun ZMC pawh tluang taka a kal zel thu leh zirlaiten exam an hmachhawn tawh ah pawh an ti that thin hle thu a sawi a. Horticulture Department chuan Mizoramin Tomato a thar chhuah hnem theih nan District tinah Operation Tomato a kalpui mek tih sawiin, dawnfawh, dragon fruit leh lakhuihthei pawh zau zawka hralhna tur sawrkar in a dap mek zel a, Sialhawk Lakhuihthei phei chu Assam ah thawn tan a ni tawh a, India ram pawn lam Dubai leh Doha a hralh turin ruahmanna chak takin a kal mek bawk a ni, a ti a. Mizoram chhung hmun hrang hrangah Artificial Turf 18 siam mek a ni a, Smart City kaltlangin International Standard Khelmual 6 leh Badminton leh Futsal khelhna changhtlung tak buatsaih tum a ni, a ti bawk.

Sawrkar flagship programme SEDP pawh chhungkaw hmasawnna tur lam hawi zawngin MLA Constituency tinah beneficiary 1500, a vaiin chhungkaw 60,000 thlan fel tawh an ni a. Rs.50,000 theuh an dawng dawn a ni, a ti bawk.

Khuallian Pu Tawnluia chuan Khawzawl District dinhmun tarlangin kar kalta August ni 12 khan district a nihna kum 3- na alo hmang ta a. Hetih chhung hian Khawzawl District hian naupang te in kawng hrang hrangin hma a sawn a ni, a ti a. District chhungah Mizoram khaw fai ber lawmman a zawna vawi 5 la thei Biate kan nei a, Mizoram pum huapa football inelnaa finalist ni thei Sialhawk kan nei bawk a, Mizoram pum huapa volleyball inelnaa finalist Khawhai kan nei bawk a, Khawhai phei hi chuan nikuma urban town intihsiaknaah ‘most improved town’ lawmman an la bawk a ni, a ti a. Khawzawl District-a a hmasa ber atan Independence Day-lawmna hmun Mualvawm Field-ah Artificial turf zawh a lo ni ta a, hmun dangah pawh phah zel kan tum a ni, a ti.

Pu Tawnluia chuan Mizoram a tomato thar tam ber chu Tualte khua an ni a, tunhnaiah hian Khawhai leh Chalrangah chhungkaw engemawzatin an ching bawk a, Hei mai bakah hian Mizorama lakhuihthei ching nasa ber chu Sialhawk leh Chalrang an ni bawk a ni a ti a. Kawlkulh hi Mizorama dragon fruit ching nasa ber pawl an ni a, hmasawnna tam tak kum thum chhung lek hian kan hmu tawh a, District kan ni hian kan rilru a tichangkangin kan hawiher a tisang bawk a ni, a ti.

Khawzawl District ah Deptartment hrang hrang awm sa leh din thar ten hma an la mek tih sawiin a hnuaia tarlan ang hian kum kalta leh kum kal lai meka an hmalakna langsar zualte a tarlang a ni.

Khawzawl ICDS Project hian Naupang kum ruk chin- 3511, Nu naupai -317, Nu naupawm (thla 6 chin)-370, Hmeichhe tleirawl (kum 11-14 school kal lo) 3 an enkawl mek a ni. Horticulture Department pawhin DHO, Khawzawl enkawlna hnuaiah MIDH leh PMKSY(CSS) hnuai atangin kuthnathawkten hlawk leh tha zawka thlai leh thei an thar chhuah theih nan hmlakna a kalpui reng a ni. Zirtirtu indaihlohna phuhruk nan leh zirna tha zawk naupangin an dawn theih nan Mizoram sorkarin Khawzawl District chhunga High School, Middle School leh Primary School ah SEDP Teachers/ Staff thahnem tak lak a ni. Samagra hnuaiah Free Text Book, Free uniform, naupang harsa leh school kal lo tan a thlawnin an awmna tur leh lehkha zirna tur Residential Special Training Centre(RSTC) hawn a ni a, Khawzawl Higher Secondary School ah Science leh Commerce zirna tur building sak mek a ni,Kum 2022 Academic session atang hian Samagra Shiksha hnuaiah Rabung Higher Secondary School hawn thar a ni a, zirtirtu mi 6 lak nghal a ni a,Elementary school 77 ah PM POSHAN(mid-day meal) naupang 3663 hnenah pek a ni.

AH& Vety Department, Khawzawl pawh tih changtlun zel a ni a, District AH&Vety Officer pawh dah tawh niin staff dang pawh dah tura kalpui mek a ni. National Animal Disease Control Programme hnuaiah ran hri venna kalpui mek niin ran 196 chiu tawh a ni. Pig Insurance kalpui tura ruahmanna peih fel a ni tawh bawk a ,Animal Husbandry Loan(KCC) chu dilna 29 chu sanctioned tawh a ni. Ran hrileng laka AH&Vety Deptt in ran vulh tute hnen a thlen zung zung theih nan Mobile Veterinary Unit pawh Khawzawl block tan pek tura hmalak fel a ni.

State Fund hnuaiah 2nd IR Commandant Bungalow leh main office building chei that a ni a. 2nd IR te hi district 3- Champhai, Khawzawl leh Saitual te law & order chungchangah a khaidingtu an ni a. 2nd IR hian SDRF mi leh sa trained tha tak neiin hmanrua changtlung tak nen khuarel chhiat tawh thulha che chhuak turin a inpeih reng a ni.

Forest Department hmalakna in Training leh Sensitization programe hman thin a ni a, Green Miozoram Day hman thin niin thing tiak thahnem tak phun a ni tawh a ni. Agriculture Department chuan leilet leh tlangram loneitute tharchhuah a lo pun theih nan theihtawpin hna an thawk thin a, thlai chi hrang hrang tha zawka chin dante zirtirin loneitute hnenah training leh a taka entirna (demonstration) an pe thin a, loneituten an tangkaipui thin hle a ni. FOCUS hmang hian loneituten hlawk zawka thlai an thar theih nan te, sum leh pai hlawk zawka an hailuh belh theih nan te hmalak a ni. A tum ber pakhat chu loneituten sik leh sa tidanglam lova kum tam tak lo an neih theih dan kawng zawn a ni. Khawzawl District Sericulture office hnuaiah hian farmer 84 (mulberry, muga, eri) te neih an ni a, SEDP ah hian farmer 50 neih mek a ni.

Kawlphetha hnianghnar zawka neih theih nan Upgradation of 11kv line to 33 LV level between Vankal & Khawzawl thawh a ni a, tunah chuan Vankal atang pawhin 33 kv in power an dawng thei tawh a. Mizorama Solar Project lian ber Power megawatt 20 pe chhuak thei tur Vankal Solar park chu nakum March, 2023 ah chuan bun zawhfel ngei beisei a ni. Hei bakah hian District chhungah hian TeleService Provider ten tan la zelin mobile tower pawh an siam belh ve zel a. Tun kum kal mekah tower siam thar- Jio in Biate ah, Airtel in Chawngtlai leh PWD Complex Khawzawla an bunte chu Power pek tawh niin duh hun huna an operate theih tura connection pek fel tawh an ni.

Khawzawl Police ten hmalaknain tunhnai ah Khawzawl khaw chhung veng hrang hrangah awareness campaign neih a ni a. Govt. Modern Middle School Building hlui Zuchhip Veng ami chu MLA Fund atanga puihna sum an hmuh Rs. 4,79,500 leh office sum tlem azawmg hmagin April, 2022 atang khan Building cheithat hna thawh a ni a August ni 1, 2022 ah an hmun thar Govt. Modern Middle School hlui Zuchhip Vengah Khawzawl SP office an insawn lut fel a ni.

Ni 100 inhlawhna kan tih mai MGNREGS pawh tluang taka kalpui mek a ni a, Mission Amrit Sarovar hnuaiah Dil (pond) 111 siam zawh a ni tawh a, SPMRM (Ruban cluster) scheme nen tangkawpin khua 13 ah hmasawnna hna thawh a ni tawh bawk. MZSRLM hnuaiah hian SHG 383 awmin, VO 28 leh CLF 1 an awm mek a ni. Tun sorkar kum chhungin training hrang hrang pek an ni a, mi rethei In sak tanpuina PMAY-G hnuaiah beneficiary mi 719 an awm a, kum 2021-22 atan target 293 an awm a ni.

Khuangthli MIP Pawlrang, Tuiphal Phase II Rabung, Phaisen hnar MIP Khawzawl ah hna thawh mek a ni a.Tuisenphaiah Ground Water scheme kalpui mek a ni a, solar hmanga tui pump na tur hmun li(4) ah verh tura ruahman a ni. Jal Jeevan Mission (JJM) kaltlangin khaw 21 ah hna thawh mek a ni. Mahni in a tui herh haw thei tawh (Completed FHTC) hi in 3641 awm tawhin, in 687 hi la hmabak a ni. Khaw 8 ah Solar Pumping hmanga tui pump chhuah tura ruahman mek a ni a, Solar Pumping hnathawk tur te hi Chhawrtui, Arro, Dulte, Pamchung ah leh Neihdawn ah thlan fel tawh a ni. Vangtlang, Rabung leh Kawlkulh ah te Tender chhuah tawh niin process mek a ni. Tin, NABARD hnuai ah Riangtlei, Sialhawk, Tualte, Chalrang, New Chalrang leh Hermon heng khuaah te hian hnathawh zawh tawh a ni-. Tin, Chawngtlai, Tlangpui leh Tlangmawi, Khawhai leh Lungtan ah te Solar Pumping hmanga tui pump chhuah hna thawh mek a ni. District huam chhungah PWD Khawzawl Division hian PMGSY scheme atanga hnathawh kawng pasarih a awm a hun reilo te ah zawhfel thuai beisei a ni.

Ration card nei chhungkaw 8,947 awmin thla tin buhfai 3,812 qlts sem thin a ni. PMGKAY scheme leh National Food Security Act(NFSA) kalpui mek a ni a, sorkar hmalaknain Khawhai FCS&CA Deptt. chu sak zawh tawh a ni a. Tunah hian Khawzawl Hermon Vengah Legal & Metrology ho tan working standard laboratory sak mek a ni.

Swachh Survekshan 2022 hnuaiah awareness campaign leh cleanliness drive NGO leh VC te nen neih a ni. Vantlang zunin 5 chei that a ni a. Solid Waste Management Center tihchangtlun nan hmalak a ni a. Single Use Plastic chungchangah awareness kalpui thin a ni bawk a. Mizoram Cleanliness Competition 2021 ah district headquarter zingah Khawzawl Town chu 4 na niin, urban town category ah Biate chu 1-na niin Khawhai chu 4 na a ni bawk. Tin,Day-National Urban Livelihood Mission hnuaiah Self Help Group(SHG) 35 a awm tawh a subsidized loan pek a ni tawh bawk.Free Skills training (General Duty Assistant leh two wheeler service technician) hi mi 37 hnenah pek a ni a. Shelter for Urban Homeless hnuaiah Special Shelter hi Khawzawl Dinthar MHIP Sub-Hqrs ah sak mek a ni. PMAY-Housing for All(Urban) pawh chak taka kalpui tum a ni.Mualvawm Field artificial turf phah zawh a ni tawh a, Pavillion sak hna hi zawh thuai tum a ni a, DUDO Office sak mek a ni a, Khawzawl Auditorium, Zuchhip Multipurpose Hall leh Khawzawl PHE Complex a basketball court tur pawh sak tan thuai tum a ni.

Khawzawl DC Office atangin kum kal mekah hetiang hian certificate pawimawh leh licence 799 lai pek chhuah ni.

Khawzawl District siam a nih hnua a vawi khat nan Independence Day-ah parade contingent ten hnam puanzar chibai an buk a, parade contingent hi 14 awmin Armed Contingent pakhat (2nd IR batallion), Unarmed Contingent pathum (NCC Govt. Khawzawl College, NCC Govt. Khawzawl High School, Students’ Police Cadet Govt. Govt. Khawzawl High School) leh School Contingent 10 an ni a. School Contingent te pual hian intihsiakna buatsah niin hetiang hi result a ni.

Pakhatna – Grace Foundation School

Pahnihna – Girls’ Contingent, Govt. Khawzawl Higher Secondary School

Pathumna – Boys’ Contingent, Govt. Khawzawl Higher Secondary School

Parade Contngent zawng zawng hnenah hian lawmman pek an nih bakah khuallian Pu Tawnluia chuan Khawzawl District tana hun pawimawh leh chhinchhiahthlak tak a nih avangin parade contingent zawng zawngte hi Rs. 10,000/- theuh a pe bawk a ni.

Mualvawm Field-a Independence Day lawmnaah hian zirna kawnga Khawzawl district ti hmingthatu mi pathum hnenah chawimawina thuziak leh tangkafai khuallian hian a hlan bawk a, heng chawimawina hlante hi

1. Dr Lalhmingmawii Renthlei MD (Pathology) d/o R. Laltanpuia (L), Khawzawl Vengthar
2. B. Vanlaltanpuii d/o B. Ramfangzauva, Khawzawl Kawnzar, M.Sc Zoology (MZU) 4th Position holder
3. Lalrinchhungi d/o Lalchhanhima, Khawzawl Electric Veng, B.A Sociology (MZU) 3rd Position holder

Mualvawm Field-a Independence Day lawmna hun hman a nih hnu hian sawmbikte pualin DC bungalow-ah DC's at Home neih a ni.