DIRECTORATE OF INFORMATION & PUBLIC RELATIONS, Government of Mizoram, India

1599/2022-2023
Saitual, the 15th August 2022: India Tukin zingkarah khan Keifang Centenary Sports Complex, Saitualah India ramin zalenna a hmuhna ni champha vawi -75na chu India ram hmung dang te rualin lawm a ni a. He huna Khuallian Home Minister Pu Lalchamliana chuan India Hnam Puanzar a pawt parh a; Hnam Puanzar zahna chibai buktu Parade Contingent te a chhang let a. Hemi hnu hian Independence Day puala thuchah a sawi chhunzawm a ni.

Home Minister Pu Lalchamliana chuan India ram zalenna champha lawm tura Parade Ground a lo kalkhawmte leh Saitual District mipui zawng zawngte chibai bukin duhsakna a hlan hmasa a. Kum tam tak chhungin Nunna hlu tam tak hlan a nih hnuah 15th Aug, 1947 khan India ram chu British awpbehna lak ata zalenna hmuin mahni inrelbawlin a lo ding tan tih a sawi a. Vawiina Zalenna Ni tak champha vawi 75-na kan lo thlen hian zalenna sualtute inpekna leh an tawrhna te kan zah thiam a pawimawh a, an inpumpekna te kha kan hre reng tur a ni a ti.

August ni 3, 2019 atangin Saitual District chu a inrelbawl hrang tan tih a sawi a. Mizoram Sawrkar chuan ruahmanna tamtak siamin tih changtlun zel a tum a ni a ti. Covid-19 vang te, sum harsatna avangte in Saitual District tana ruahmanna tamtak la tih puitlin ngai a awm thu a sawi a. Tunah hian Department 23 lai awmin theih ang tawkin hma lak mek a ni a, Sawrkar dinhmun han ziaawm chho se, hmasawnna tam tak kan la hmuh belh dawn a ni a ti.

He hunah hian Home Minister Pu Lalchamliana chuan a hnuaia tarlan ang hian Saitual District chhunga hmasawnna hrang hrang zinga langsar deuh te a sawi a ni.

1. Deputy Commissioner Office sakna tur hian ni 8.1.2021-ah khan Mizoram Chief Minister zahawm tak Pu Zoramthanga’n lungphum a phum a nih kha: Tunah hian Office Building hi zaa sawm ruk (60%) sak zawh tawh a ni a, Office building thar hi luah luh thuai beisei a ni.

• Tunah hian DC Office hian Saitual District mipuite mamawh service hrang hrang bakah Covid-19 kaihhnawiha tul te tha takin a thawk a.

• National Highway (i.e. NH-6 & NH-102B) siam an vil bakah compensation dik taka pe tur te in an thawk rim hle a ni.

• Disaster Management & Rehabilitation Department hian District ah chuan DC Office behchhanin hna a thawk a. DC te hi Chairman, District Disaster Management Authority niin chhiatrupna a thlen pawha hmalatu an ni a. Kuminah hian Saitual District tan SDMF atan Rs. 5 lakh (nuai nga) leh Covid-19 do nan Rs. 20 lakh (nuai sawmhnih) pek tawh niin chhiatna thlen theihna hrang hrang venna tur hnathawh hrang hrang SDRMF atan Rs. 45 lakh (nuai sawmli panga) ruahman fel a ni leh tawh a, SDMF atan Rs. 21.84 lakh (nuai sawmhnih pakhat sing riat sang li) pek a ni leh bawk a ni.

2. Superintendent of Police, Saitual Office hmun atan BRTF hmun hlui, Keifang ami hi ruahman a ni a. He building sakna tur hian Rs. 688.72 lakh duan niin State Sawrkarah bawhzui mek a ni a. Hemi bakah hian SP Saitual Office & Residential building te sakna turin NEC leh ADB ah te sum dil mek a ni.

• Saitual District Police hian kuminah ruihhlo Heroin (No.4) Gram 56, Rs. 28 lakh (nuai sawmhnih pariat) man hu leh Ganja Kg 29 an man tawh a.

• Danin zawrh a phal loh Foreign Cigarette Rs. 23.87/- (nuai sawmhnih pathum singriat sangsarih) man hu an man tawh bawk.

• Saitual District huam chhungah School naupang naupang 368 hnenah War on Drugs signature campaign an nei tawh a ni.

3. Public Works Department hnuaiah hna kallai hmun 17-ah awmin SEDP scheme hnuaiah hna pakhat(1) thawh mek a ni a. PMGSY hnuaia hna thawh zingah heng 5 te hi thawh zawh tawh a ni:

1. N. Lungpher – Buhban Road (6.770 km).

2. Dilkhan– N. Lungpher Road (12.680 km).

3. Khanpui –Lailak Road (2.890 kmp).

4. Phullen – Zawngin Road (12.360 kmp).

5. Phullen –Luangpawn Road (7.180 kmp).

4. District Urban Development Office, UD&PA chuan PMAY-Housing For All (Urban) hnuaiah mi 1260 allot zingah mi 312 tan 1st instalment a pe tawh a, mi 182 tan 2nd instalment leh mi 162 tan 3rd instalment a pe tawh bawk a ni.

SWACHH BHARAT MISSION (URBAN)- a khawpui fai intihsiaknaah Saitual District kan che tha hle a, Saitual Town chuan Mizoram Khawpui Fai Intihsiakna Category-II (Dist. Hqrs)-ah Lawmman 1-na a dawng a. Category-III (Other Urban Town)-ah Ngopa chuan 2-na dawngin Phullen in lawmman 9-na a dawng bawk a, a lawmawmin in entawn tlak hle a ni.

• Solid waste management (SWM) atan Ramlaitui ram ruahman a ni a, kum 2021 atang khan Saitual District chhungah Sanitation License kalpui a ni.

• Support to Urban Street Vendors kalpui mek ah sumdawnna tenau zawk ti tu te eizawnna turin Lungdawhkawn leh PWD Kawn chu vending zone atan puan a ni a. Street vendors 16 approve tawh an ni.

5. Project Director, District Rural Development Agency (DRDA) hnuaiah MGNREGS Job Card holder mi 11963 awmin, tun dinhmunah ni 33 inhlawhna pek tawh a ni.

• Mission Amrit Sarovar kalpuina atangin tuikhuah 75 siam a ni a.

• PMKSY (2021-2022) hnuaiah Cemetery House cum Godown Hliappui Thlanmual 1 & 2 leh Pawlrangah siam a ni a.

• Heng bakah hian Water Harvesting structure te siam a nih bakah thei leh thlai hrang hrang hlawhtling taka ching turin khaw hrang hrangah hma lak a ni.

6. District Treasury Office hi 1st July 2022 atang khan a function a. Tunah hian DDO 15 awmin IFMIS (Integrated Financial Management Information System) pawh hlawhtling taka kalpui nghal a ni.

7. District Agriculture Office chuan SEDP hnuaiah chhungkaw 967 hnenah Vaimim Kg 20 theuh a pe tawh a, chhungkaw 114 hnenah a chi 4000 theuh pek a ni. August 2022 atanga sem turin chhungkaw 967 tan Soyabean chi Kg 2.5 theuh ruahman a ni.

8. District Education Office hnuaiah Saitual District chhungah School 201 awmin thawktu 1257 leh zirlai 10797 an awm mek a.

Kumin 2022 ah SEDP hnuaiah thawktu 86 lak thar an ni a, CSS Teacher- High School atan 10 leh Middle school atan 58 pek an ni.

9. District Project Co-ordinator (Samagra) hnuaiah NE Tlangnuam HSS, Phuaibuang HSS & Kawlbem HSS te sak mek a ni.

• PM Poshan (Mid Day Meal) tha taka sem chhuah thin a ni a.

• Saitual District ah hian CwSN (Children with Special Needs) 188 an awm a, heng zirlaite hnenah Student Oriented components atangin Stipend leh Allowance hrang hrang te pek a ni.

10. SDO, PHED Saitual WATSAN chuan Jal Jeevan Mission hnuaiah khaw 36 a hmalak tumin tun thleng hian 73% vel a hlawhtling tawh a. 2021 thleng khan khaw 16 tuam zawh tawh niin 2021-2022 chhungah khaw 16 ah hma lak mek a ni a, 2022-23 ah hian khaw 4 tuam chhuah leh tum a ni.

11. SDO, P&E Department chuan Saitual Power Sub-Division hnuaia Consumer 7710 atangin revenue Rs.3,68,05,214/- (Cheng Vaibelchhe thum Nuai sawm ruk pariat sang nga za hnih) a hmu.

• Dan dik lova Electric hmang man chhuahte atangin Rs. 9,640/- chawitir tawh an ni bawk.

12. Government Saitual College ah Rs. 90 lakh senga RUSA scheme hnuaia sak Library Building chu 80% zawh fel tawh a ni.

13. District Hospital, Saitual chuan Hospital fai leh thianghlim inelna ‘Kayakalp Award 2021-2022’-ah CHC Category-ah lawmman pakhatna a dawng a. Hospital bed occupancy chu 50% atangin70%-ah a kaisang bawk.

• National Ambulance Service hmangin Hospital-a nau nei tur lam leh thlah (Pick up & drop off) chu kalpui tan a ni.

• Kum 18 chung lam zingah Covid Vaccination 1st dose mi 95.87% in an la tawh a, 2nd dose la tawh 92.57% an ni a, Precautionary dose kalpui mekah September thla tawpah chuan 90% cover hman tumin hma lak mek a ni.

14. District Research Officer, Economics & Statistics Department hnuaiah Birth Certificate 176 pek chhuah a ni a, Death Certificate 158 pek chhuah tawh a ni bawk. January-July 2022 chhungin Birth & Death Certificates pek chhuah atangin State Sawrkarah Rs.1,34,800/- chhun luh a ni.

15. Fishery Extension Office atangin PMMSY hnuaiah Sangha vulhtu mi 21 hnenah Sangha dil thar (New Pond) siamna atan leh mi 6 hnenah Sangha dil enkawlna (Rearing pond) atan tanpuina pek chhuah a ni.

16. District Veterinary Office chuan khaw 8 ah ASF Awareness Campaign a nei tawh a ni.

17. District Village Industries Office, Mizoram KVI Board hnuaiah mi 110 tan PMEGP Awareness a nei tawh a. PMEGP atan Project pariat (8) chu Bank-ah theh luh tawh niin heng zing project pali (4) chu pawm tawh a ni a. Heng atanga margin money claimed zat chu Rs. 10.11 lakhs a ni.

18. Taxation Department hi kan thang khawp mai a. Nikum financial year a kan target Rs. Vaibelchhe 717.03 kha vaibelchhe 177.71 in kan khum a. Kumin June thleng hian Tax hrang hrang Rs. 328.29 Crore kan la khawm leh tawh a ni.

• Saitual District ah hian GST registered dealer hi 24 an awm mek a.

• Taxation Zonal Office nei ngei turin hma kan la mek a, chhan hrang hrang vangin a la hlawhtling thei rih lo va. Tunah hian Aizawl North Zone in a la enkawl rih a ni.

Saituala Independence Day Champha vawi 75-na lawmna inkhawmah hian School Parade Contingent19 an awm a. Brass Band Party, MRHG & CD, CTI Sesawng in India Hnam Hla an rimawi nen an rem a, 2 IR Battalion, Khawzawl ten Guard of Honour an pe thung a ni. Parade Commander hi Inspector MP Dahal, 2 IR Battalion, Khawzawl niin second commander chu chu ASI Lalrinngheta, Satual PS a ni.

Parade zingah hian Government High School, Rulchawm an thiam ber a. PES Keifang leh District HSS Keifang te chu pahnihna leh pathumna an ni thung.

Khuallian in Independence Day puala thuchah a sawi zawhah lawman semna hun neih a ni a. Parade contingent te hnenah lawmman Khuallian in a hlan hmasa a. Hemi zawh hian Zirtirtu hnathawktha chawimawi niin Pu Caleb Lalhmachhuana, Principal, District Higher Secondary School, Keifang leh Pu T.Lalramnghaka, Headmaster, Govt Selchhunga Primary School, Saitual ten chawimawina thuziak leh medal Khuallian hnen atangin an dawng a ni. Lawmman semmna zawhah ‘Kite Festival – Sapno ki Udaan’ buatsaih a ni a. He hunah hian PMAY insak tanpuina dawngtuten lawmthu sawina lantir nan India Flag rawng ang chiah lehkhachaih te an chaih a ni.

Keifang Centenary Sports Complex a hun hman zawhah hian Saitual DC's Bungalow ah VIP’s at Home Pu VL Hruaizela Khiangte, Deputy Commissioner, Saitual District chuan sawmbik te pualin a buatsaih a. Aizawl atangin Aizawl Mayor Pu Lalrinenga Sailo, Pu John Neihlaia, IGP, Pu Benjamin Lalzama, Director, DM&R, Pu R.Zosiamliana, Addl.Commissioner of Taxes leh senior officer ten Home Minister hi an tawiawm a ni. He hunah hian District Hospital Saitual leh Hlimna In ( Girls’s Home) Saitual te hnenah thilpek hlan a ni bawk a ni.

Independence Day lawmna programme zawh hian Home Minister Pu Lalchamliana chuan Saitual DC Office Complex, Saitual Superintendent of Police Office building leh District Jail building leh a hmunhma te a endik nghal a. Saitual DC Pu VL Hruaizela Khiangte leh Saitual SP J. Lalmuankima ten Home Minister hi an lo dawngsawng a ni.