403/2023-2024

Aizawl, the 11^th May 2023 : Vawiin khan Deputy Chief Minister Pu Tawnluia hovin Mizoram chhunga lui hrang hrang te humhalhna atana Committee on Draft Mizoram Protection Bill hnuaia Sub-Committee in dan an duan chhin chu thlirho leh sawiho a ni a. Dan duan chhin (Draft Bill) sawihona ah hian Agriculture Minister Pu C. Lalrinsanga leh LAD Minister Pu K. Lalrinliana, Chief Secretary Dr. Renu Sharma te pawh an tel a ni.

Thuhma sawiin Deputy Chief Minister Pu Tawnluia chuan Mizoram chhunga lui hrang hrangte chu tui in tur atan te, thali chawmna atan leh thil danga kan rinpui berte an ni a, mihring kan kan lo pung chho zel angin tui mamawhna pawh a sang chho ve zel a, mahse hetih rualin kan tuihnate kiam lam a pan zel si avangin nasa leh zawka kan lui te hi humhalh a ngaih avangin hetaing dan siam chu tul a hriain dan ruangam tur hi duan chin a nih thu tarlang a ni.

Sawihona ah Agriculture Minister Pu C. Lalrinsanga, he dan duang tura din Sub Committee Chairman pawhin sik leh sa inthlak danglam nasat avangin Sawrkar in hmathlir thui tak neiin lui te humhalhna dan neih chu tha a tih avangin a ruangam tur duan a ni, a ti a. Dan puitling leh fuankim tak anih theih nan tui leh lui chungchanga dan awmsa te zirchianga chungte nen en milh he dan hi duan chhin a nih thu a sawi.

Meeting ah hian The Mizoram (Protection of Rivers) Bill, 2023 duan chhin chu zau taka sawiho niin a bung leh chang hrang hrangte uluk taka thlirho a ni. Meeting ah hian he dan in a hrut leh a kaihhnawih Department hrang hrang – PHE; Environment, Forest & Climate Change; Agriculture; Irrigation & Water Resources; Land Resources, Soil & Water Conservation; Local Administration; Land Revenue & Settlement leh Fisheries Department-te aiawh bakah GAD leh Planning & Programme Implementation Department Secretary te an tel a ni.

June ni 23, 2022 a Chief Minister Office ah State Level Save Tlawng Committee thutkhawmah, Tlawnglui bakah Mizoram lui zawng zawng fuankima dan siam chu tha an ti a. Chumi dung zuiin Sawrkarin Deputy Chief Minister Chairman-na hnuaia Committee on Draft Mizoram River Protection Bill a din a. Committee ah hian Agriculture Minister; Land Revenue & Settlement Minister, LAD Minister leh Envrioment, Forests & Climate Change Minister te bakah Department 11 te Secretary te chu Member an ni a. He Committee chuan Draft Bill buatsaih turin Agriculture Minister Pu C. Lalrinsanga kaihhruaina hnuaia Sub-Committee a din leh a. Sub Committee chuan hemi atan Member 7 telna Working Group an din ve leh a. Sub-Committee in tum 5 lai an thutkhawm hnua in Bill hi buatsaih a lo ni ta a ni.