No.3228/2019-2020

Aizawl, the 23rd March 2020 : COVID-19 avanga partial lock-down awm hnuah mipuiin tui an nghei loh nan PHE chuan tan a la dawn tih vawiin khan Public Health Engineering (PHE) Department changtu Deputy Chief Minister Pu Tawnluia chuan a sawi. He thu hi vawiina PHE hotuliante nen COVID-19 do nana hmalak dan tur chungchang meeting-ah a sawi a ni.

Meeting-ah hian Engineer-in-Chief Er.Lalmuanzova tiamin PHE hotulu mi pali an tel a. Deputy Chief Minister chuan COVID-19 vanga mipui vahvel khuahkhirhna (partial lock down) kenkawh a nih hnuah Mizoram hmun hrang hranga tui supply dinhmun endik tura a lo hriattir tawh angin PHE Department chuan an bawhzui nghal a. Vawiin meeting-ah hian Mizoram hmun hrang hrangah tui supply hniang hnar tawk a awm rih thu an sawi. Pu Tawnluia chuan water supply khaihlak lova mipuiin an dawn reng theihna tura tan la turin a hriattir a, chutihrual chuan thal a intan dawn chauh a, kan hma lam hunah eng nge kan tawn dawn tih a hriatloh avangin mitinin tui a theih ang anga renchem turin mipuite a ngen bawk a ni.

Mipui mamawhna avangin tui semtute leh pump-a thawkte chu partial lock-down puan hnuah chawl lovin an hna an thawk chhunzawm a. COVID-19 laka him nan kutkawr leh mask sem a ni a, market-ah tui semtute daih lei tur a awm loh avangin lei belh tur dap mek a ni bawk. Tui bill pekna hmun (counter)-ah mi engemawzat in tlar a ngaih thin avangin thu leh awm hma chu counter hi khar mai ni se tiin an rel a. Online system - mobile phone app (Gpay, PhonePe) leh PHE Department website billpay.phedmizoram.in kaltlangin bill hi pek tur a ni. PHE bill pekna portal hi bill lehkhaah chiang taka tarlan vek a ni. Online a bill pek theih hun chhung hi tun thla atan March ni 30 thleng hun pawhsei a ni bawk.

Novel Coronavirus hi inkaichhawn awlsam tak a nih avangin tui connection thar pek tur sanction awm sa, bawhzui lai mek engemawzat awm pawh tih tawp rih a ni dawn a. Remchang hmasa berah hei hi chhunzawm leh tur a ni ang.

Deputy Chief Minister Pu Tawnluia chuan Novel Coronavirus laka kan him theih nana sawrkar hmalak meknate lawmawm a ti a, mipui pawhin tawiawm chhunzawm zel turin a sawm a ni.