Vawiin  khan UD&PA Department buatsaihin Secretariat Office tualzawl, Mizoram New Capital Complex-ah  Swachhta Hi Seva (Faina hi rawngbawlna a ni) tih thupuia hmangin hun pawimawh tak buatsaih a ni a, Deputy Chief Minister Pu Tawnluia’n he hun hi a hmanpui a ni.

Swachhta Hi Seva hi September ni 14, 2019-October ni 2, 2019 inkara hman niin hemi chhubg hian India ram pumah faina kawnga inzirtirna hun hman niin kumin atan hian a bikin Plastic hman nawn theihloh chi hmang lo tura inzitirna kalpui a ni.

Vawiin hun hmanpuitu Pu tawnluia chuan Mahatma Gandhi-an faina a ngaihpawimawhzia hriatreng nan a piancham vawi 150-na denchhenin hetiang hun hi hman a ni a, faina leh thianghlimna kawnga inzirtirna hi kalpui chhunzawm zel a ni dawn a ni a ti a. Mizoramah pawh kum 1977 atangin Faina Hapta hi hman tan a ni a, hma kan sawn tawh hle a ni tiin faina lama hmasawn kawngah leilung tichhetu plastic hmanglo tura inzirtir hi ngawrh lehzuala kalpui a ngai a ni a ti.

Vawiina Swachhta Hi Seva pual hun hmang tura kalkhawmte hian UD&PA Director, Pu Joseph H. Lalramsanga kaihhruaina hnuaiah Plastic hmang lo tura intiamna an nei a, hemi hnu hian group li ah inthenin Mizoram New Capital Complex chhung hmun hrang hrang thianfaiin an hnatlang nghal a ni.

Providence School leh Mt. Carmel School atangin zirlai leh zirtirtu volunteers engemawzatin vawiin hun hi hmanpuiin an hnatlang bawk a ni.