Nimin tlai khan Chief Minister Pu Zoramthanga chu a chenna inah Republic of the Union of Myanmar atanga sipai hotu sawm (10) lo kal te nen an inkawm.

Myanmar atanga sipai hotu lo kalte hi India sawrkar inrelbawl dan leh a bik takin Central leh State sawrkar inlaichin dan zirchiang tura Diplomatic Outreach programme hmanga rawn zin an ni a. Mizoram an lo kal thei chu lawmawm an tih thu Chief Minister hi hrilhin, India ram an cham chhungin an ram tana tangkai thei tur thil tam tak an zirchhuah thu an sawi. Myanmar Military Delegates aiawhin Lt. General Aung Lin Dwe chuan Mizoram chu state buai tak thin atanga state ralmuang tak a ni ta chu fakawm a tih thu sawiin, remna tluantling a neih theih dan te chu zirchian tham nia a hriat thu a sawi.

CM Pu Zoramthanga leh Lt. General Aung Lin Dwe chuan India leh Myanmar ram inlaichinna leh sumdawntawnna chungchang te sawi dun in, Mizoram pawimawhna te sawi a ni a. Kaladan Multi Modal Project chu ram pahnih tana ei leh bara thil tangkai tak a nih tur mai bakah khawtlang nun chawikanna tha tak a nih a rin tur thu Aung Lin Dwea chuan a sawii. Chief Minister Pu Zoramthanga chuan ram pahnih inlaichinna tha zawk neih zel leh Myanmar ramin remna tluangtling a neih ve a duhsak thu a sawi bawk.

Myanmar atanga sipai lo kalte hi Lt. General Aung Lin Dwe, Office of the Judge Advocate General, Maj. General Soe Naing Oo, Maj. General Than Hlut Thein, Colonel Khin Maung Kyi, Colonel Kyaw Soe Oo, Colonel Kyaw Lin Maung, Lt. Colonel Than Soe, Lt. Colonel Khin Zaw leh Captain Thet Zin Aung te an ni a. Chief Minister hian Cultural Show-cum-dinner a buatsaih sak a. Vawiin hian Mizoram an chhuahsan dawn a ni.