Rashtriya Poshan Maah (National Nutrition Month) chu September thla chhungin hlawhtling tak a hman a nih hnu vawiin khan Synod Conference Centre ah a kharna programme hman a ni a, he hun hi Social Welfare Minister Dr. K. Beichhua’n a hmanpui a, he hunah hian Mizoram in kum 2018-2019 atana Rahstriya Poshan Abhiyaan National Award tun hnaia a dawn chu a lawmna programme buatsaih nghal a ni bawk.

Social Welfare Minister Dr. K. Beichhua chuan September thla Poshan Maah hman chhungin District, Block leh Aganwadi Centre level ah te  programme hrang hrang huaihawta, hlawhtling taka neih chu lawmawm a tih thu sawiin he kan hlawhtlinna hi Department khat hmalakna chauh a ni lova, Deapartment hrang hranga hnathawkte inkara thawhhona tha kan neih vang a ni, a ti a. Nikum aiin Department dang puihna leh tawiawmna an hmu tha in, mipui leh pawl ten he programme hi neitu nihna neiin an hlutpui chuan nasa takin he programme hi a tihlawhtling tih a sawi a. Naupang leh nu naupai te tana chaw tha pawimawh zia zirtir chu Poshan Maah chhung chauh ni lovin dam chhungin midangte zirtir zel turin kalkawmte a chah a ni.

Minister chuan State 11 zingah Mizoramin, Award 3 awm naah, lawmman pakhatna, chi hnih a dawng chu a ropui tiin hei hi kan thawhhona tha rah kan sengna a ni a, mimal thahnemngaihna leh thawhrimna vang ni lovin kan zavaia thawhrimna leh inpekna vang a ni, a ti a. Taima taka kan thawh chhoh zel a, Department hrang hrang te, Khawtlang hruaitute leh mipuite pheikhai rual taka  thawhho chhoh zel chuan Poshan Abhiyaan thiltum naupang thanthu tih tlem te, naupang ei chhiat vanga cher lutuk te, anaemia te hi chu umbo anih theih a beisei tih a sawi bawk.

Award lawmna programme hi Pi Zoramthangi Hauhnar, Secretary, Social Welfare Department in kaihruaiin Pi Zonunpari Sailo, Nodal Officer in Award dawn chungchang leh a chanchin sawina hun a neiin Pi Vanlalpianpuii, Director, Women & Child Development, Social Welfare Department chuan lawmthu sawiin hun a khar a ni.

Ministry of Women & Child Development in an buatsaih "Poshan Abhiyaan Award 2018-2019", ah Mizoram chuan Category hnih (2) ah Incentive Award laiin, he Award hian Citation leh pawisa fai cheng nuai 250 a keng tel a ni.

Poshan Abhiyaan Award-ah hian State/UT 36 te mihring cheng zat a zirin Group-4 ah then an ni a, Mizoram hi Group-3 category naah dah a ni a, Implementation of ICDS-CAS ah leh Overall Excellence in Implementation ah 1st Position ve ve a hmu. Overall Excellence Award hian sumfai cheng nuai 150 leh ICDS CAS Implementation Award in cheng nuai 100 a keng tel a ni.

Hei bakah hian Field Level Leadership Awards-ah Champhai District in "Best District award" an dawng a, Thingdawl ICDS Project in "Best Block Award" an dawng bawk a. Champhai ICDS Project hnuai a Vengthlang Anganwadi Center-3 leh Thingdawl ICDS Project hnuai a Bualpui Anganwadi Center - 3 ten Best Anganwadi Worker, Anganwadi Helper, ASHA, ANM & LS (AAAA & LS) Award la in, incentive pawisa fai 2.5 lakhs ve ve an dawng bawk a ni.

Rastriya Poshan Maah hi 2nd September, 2019 khan Dr. K. Beichhua, vek hian Social Welfare Department Conference hall ah a hawnna (Launching) programme a lo nei tawh a. Poshan Maah 2019 chhung hian tih tur hrang hrang (activities) tam tak duan a ni a, Women & Child Development, Social Welfare Department chuan District 8 a ICDS project 27 ah te nasa tak a hmalak a ni a, Line Department dang nutrition leh hriselna lam a mawhphurhna neite nen thawhhona tur leh ruahmanna tam tak siam niin Mizoram hmun hrang hrang ah activities tam tak, Poshan Rally, Food Mela, Haat Bazar, Nutrition Marathon, Food demonstration, School based events, TV leh Radio programme leh dang te neih a ni.

Ram chhung hmun tam takah, naupang, a bik takin kum 6 hnuai lam ten ei tur chaw tha an hmuh loh avangin an taksa a than tur angin an thang lova, hemi avangin an len hnua rilru leh taksaah harsatna hrang hrang tawk thin a. Chutiang bawkin nu nau pai leh nau nei ten ei leh in tur tha an fate mamawh ang an pek theih loh avangin an hriselna te panin an thang tha lova. Hei hi ti ziahawma ICDS programme tichak turin National Nutrition Mission (NNM) chu 2017 khan Sawrkar Laipui chuan duang chhuakin, 2018 atangin a kalpui tan a, a bul tanna kum 2017-18 a ram chhung District 315 a tan phawt niin a kum leh 2018-19 ah District 235 ah te kalpui tan leh ani a, 2019-20 chhungin ram pum huam vek tura duan a ni.