Vawiin chawhnu khan School Education Minister Pu Lalchhandama Ralte chuan Khawvel puma upate ni Durtlang Leitan hall-ah a hmanpui a, Leitan MUP Branch ten Upa te In an sak mek lungphum a phum bawk.
 
Minister chuan he hunah hian thusawiin Mizoram sorkar chuan upate pension tihpun a remti a ni tih a sawi a. Pension tihpun thu hi Council of Ministers Thawhtannia neih chuan a rel a, tuna an lak lai letin a pung dawn tih a sawi.
   
Minister chuan tunlai khawvelah kum lama upate hlutna hi a zual zel dawn a, chhungkua, kohhran leh khawtlang thilah te upate uapnaah kan hlim a, kan thla a muang thin a, kohhran leh khawtlang thilte hi thangtharte kuta dah mai lovin upate pawimawhna hre thar deuh deuh turin kalkhawmte chu a sawm a ni. Tunlai technology thar lo chhuak zelah pawh inkiltawihna nei lova, upa tunlai deuh nih ve hram hram a tha a ni a ti a. Khawvel hmasawnna hi upate ta a ni ve tho tih hria a, hma lam thlirna nei zel turin a sawm a ni.
   
Pu Lalchhandama Ralte chuan tunlai thangtharte hi zilh leh kaihhruai kan ngai hle tih sawiin aia upa zahnate, tlawmngaihna te, chhiatni thatnia awmdan turte hi upaten thangtharte hrilh thar zel a ngai hle a ni a ti a.Mizo nunphungah milian leh mite awm lova khawsa thin ni mah ila, tun hnaiah mahni inngaih pawimawhna a lian sawt hle a, chuvangin nunphung tha, kan hnam ze mawi hi thangtharte zirtir zel a ngai hle a ni a ti.
   
Pi R.Zomuanpuii Counsellor AMC Ward No 1 pawhin thu sawiin, upate chu in vawngfai fo tur leh incheina lamah pawh inthlahdah mai lo turin a chah a, chu chuan anmahni a vawng nung reng dawn a ni a ti.
   
Khawvel puma upate Ni Leitan YMA Hall a hmannaah hian MUP member te, Leitan khawtlang hruaitute, YMA leh MHIP hruaitute pawh an tel a ni.