1434/2023-2024

Aizawl, the 9^th August 2023 : Deputy Chief Minister Pu Tawnluia’n vawiin khan Aizawl Smart City hmalaknaa Aizawl khawpui hmun engemaw zata man chawia tui in tur thianghlim dawhna ‘Roadside Drinking Water Kiosk’ leh hmankhat daih plastic tui um tihriralna ‘Reverse Vending Machine’ an dah te mipuiin tangkai taka an hman theih nan mipuite hnena a hlanna programme tawite SAD Conference Hall ah a hmanpui a. Programme tan hmain MINECO Main Gate kawta heng khawl pahnih dahte hi a hawng a, hetah hian kawngsira chawhmeh zuar te tan dawhkan changkang ‘Street Vendors Modular Kiosks’ Aizawl Smart City in a ruahman chu a hmangtute hnenah a hlan nghal bawk a ni.

Pu Tawnluia chuan heng khawl pahnih te hi Aizawl khawpui leh a chhunga chengte tan thil thar tun hmaa la awm ngai lo, remchanna changkang tak mipuiin an chhawr tangkai theih tur ruahmanna a nih dante a sawi a. Reverse Vending Machine phei chu tui inna plastic um ruak miin an paih mai mai thin senghawi leh sawngbawlna kawngah min pui theiin ka ring a, mipuiin kan hman tangkai zel chhoh chuan Aizawl khawpuiin faina leh thianghlimna kawngah hma kan sawnna a ni thei dawn a ni, a ti. Aizawl Smart City bultanna chu chhan hrang hrang avangin a tir lamah a hnufum dante leh hmalakna te kum hnih chhung hripui a len avangin a thuanawp dante sawiin project hun a tawp hmain hmalakna leh hna kal mek te chu zawhfel a nih theih nan theitawp chhuahin tan kan la mek a ni, a ti. Deputy Chief Minister chuan heng khawl te hi mipui ta, mipui tan a ni tiin Sawrkarin sum tak tak sengin a chhawpchhuak a, vantlang thil ni mahse mitin in kan hman tangkai tur anih angin a hlawhtlinna chu mipui kutah a innghat a ni tiin neitu rilru pua hmang leh enkawl turin mipuite a chah a ni.

Hun hmanpuitu dang Aizawl Deputy Mayor Pu R. Thanglura pawhin thu sawiin heng hmasawnna te hi Aizawl khawpui tan bung thar kaina a ni tiin Aizawl khawpui tih changtlunna kawngah hmalakna pawimawh tak a nih thu te a sawi tel bawk a ni.

Deputy Chief Minister leh Deputy Mayor, AMC ten heng khawl hunna veng Local Council te leh pawl thenkhatte hnenah a enkawlna chungchangah inremna thutlung ziah te an hlan a ni.

Programme hi Secretary, Planning & Programme Implementation Department, Pu Lalmalsawma Pachuau in kaihruaiin Pu V. Lalruatliana, Deputy CEO, Aizawl Smart City Limited hnen atangin Technical Report ngaihthlak a ni a, Pu C.C. Lalchhuangkima, CEO, Aizawl Smart City Limited in lawmthu sawiin hun a khar a ni.

Man chawia tui intur thianghlim dawhna khawl ‘Roadside Drinking Water Kiosk' hi Aizawl veng hrang hrang leh hmun pawimawh tiamin hmun 24 ah bun a ni a. Cheng khat thir in tui ml 500 leh cheng hnih thirin tui litre khat a lei theih a, a tui hi UV filteration hmanga he khawl chhunga awm khawl hrang hrang 3 in a tihfai hnua lo chhuak a ni.  He khawl hian tui litre 120 vawikhatah a stock thei a, a sirah LED display a awm bawk a ni.

Hmankhat daih plastic tui um ruak tihriralna ‘Reverse Vending Machine’ hi Aizawl veng hrang hrang leh hmun pawimawh tiamin hmun 17 ah dah a ni a. Bur ruak nawrhluhna awmin, bur ruak chu khawlin a chhungah a chep nawi a. Buar ruak nawr luh hnuin coupon hman tangkai theih a rawn chhuak thei dawn a. Bur ruak gram 80 aia rit chu khawl in a la lut lova, a rawn nawrchhuak a. Plastic a cheh nawi hi bawlhlawh sawngbawl pawl No Waste in kg khat cheng 5 zelin an lei dawn a ni. Tum khata plastic cheh nawi kg 20 khawl theiin a sirah LED display a awm bawk a ni.

Kawngsira chawhmeh zuar te tan dawhkan changkang ‘Street Vendors Modular Kiosks’ 94 siam te pawh he hunah hian a hmangtute  hlan an ni a. Steel tha chi leh darthlalanga siam niin pawhdawh kalh theih pawh a awm tel bawk a ni.