3904/2022-2023
Aizawl The 21st March 2023: Vawiin khan Chawnpui Veng Multipurpose Hall leh Govt. Model Middle School building tur lungphum phumna chu MHIP Hall, Chawnpui ah neih a ni a, Dy.Chief Minister Pu Tawnluia chu khuallian niin lungphumna hi a nei a ni.

Khuallian chuan Multipurpose Hall leh Govt. Model Middle School sak anih theihna tur hian Presbyterian Kohhran,Chawnpui ram leh tuna Govt. Model Middle School ram chu inthleng a nih thu sawiin, Presbytarian Kohhran Chawnpui ten ram inthleng an phal leh School Education Department ten an lo pawmpui chu thil lawmawm tak ani, a ti. Building sak turah hian zirna sikul chu ngaihpawimawh ber anih tur thu a tarlang a, facilities tha ber ber chu sikul hian a neih phah dawn a ni, a ti bawk. Govt.Model Middle School chu Mizorama sikul upa ber pawl anih thu sawiin,tun dinhmunah duh angin zirlai admission pek tam theih anih loh thu tarlangin, building sak zawh anih chuan zirlai tam zawk ten admission an hmu thei tawh dawn a ni, a ti.

Dy. Chief Minister chuan building thar sak tur chu khawtlang mipuiten an chhawr tangkai dawn hle a, a bik takin chhiatni thatni ah a tangkai hle dawn a ni a ti. Building thar ah hian Recreation Centre-a awm tur thu tarlangin, Mizoram Upa Pawl(MUP)Chawnpui Branch ten tangkai tak a an hman theih tur thu a sawi bawk . Building thar tur hi tha taka sak anih theih nan UD & PA Department chuan a viltu tur committee a siam dawn thu a tarlang a, chutih rualin khawtlang mipuite chu a neitu tur an nih ang takin neitu thinlung pu a hnathawktute endik kawngah leh sak zawh anih hun a enkawlna lamah theihtawp chhuah turin a sawm nghal a ni.

Pu Tawnluia chuan Multipurpose Hall leh Govt.Model Middle School, Chawnpui sak tura a bul tumtu ber (nodal department) Urban Development & Poverty Alleviation(UD&PA)-te hmalakna chu fakawm a tih thu a sawi a. Khawpui hmasawnna tur atan a theih tawp chhuah zel tur leh khawpui chhung a mi harsa zual ‘urban poor’ chhungkua te hmasawnna, hamthatna tur haichhuah kawngah leh dawmkan hna thawh kawngah nasa zawka tan la thar turin a chah bawk a ni.

Khualzahawm,Pu Lalchhandama Ralte, Hon’ble Minister, School Education Department pawhin thu sawiin, zirna hi a laimu berah dah thiam a tul a, ram leh hnam hmasawnna tur chuan zirna sikul tha neih angai a,India rama zirna sikul tha ber te zingah Mizoram sikul te a tel ve theihna turin mizoram sawrkarin theihtawp a chhuah mek zel a ni, a ti. National Education Policy(NEP)2020-in zirna,sports leh skill development a kaihkawp thu tarlangin,vawiina lungphum phum tak project pawh hi NEP 2020-tihhlawhtlinna atana tangkai tak anih a beisei thu a tarlang a ni. Covid-19 hripui len nasat lai kum-3 vel chhung khan India ram state hrang hrang ten ‘offline exam’-an nei thei lo a, Mizoramah chuan ‘offline exam’ tluang tak a neih a nih bakah, School Calendar ang thlapin a hun takah result tihchhuah theih anih thu sawiin, he hlawhtlinna ropui tak hi sawrkar hmalakna mai ni lovin mipuite nena thawhhona tha a awm vang ani a ti a. Mizoramah zirna in hma a sawn zel nana thawhpui turin mipuite a sawm nghal a ni.

Pu C.Malsawma, Executive Engineer, UD&PA Department chuan Technical Report pe in,Chawnpui Multipurpose Hall leh Govt.Model Middle School tan hian State Fund-atangin cheng nuai 700 hmuh ani a, LHM Infra,Khatla, Aizawl chu a sak hna thawk tura thlan an ni a ti a. Building hi chhawng 5-a sak tur niin floor hrang hrang te hman dan tur hetiang hian a tarlang nghal a ni.

1. Ground Floor –Multipurpose Hall cum Badminton Hall

2. Basement I - (i) Headmaster/Staff Room

(ii)Computer Room

(iii)Parking/School Assembly

3. Basement II –Class Room

4. Basement III – (i)MUP Recreation Centre

(ii)School Kitchen

5. Basement IV –Games &Sport Room

Chawnpui Multipurpose Hall leh Govt.Model Middle School lungphum phumna  inkhawm hi Pu Lalmalsawma Pachuau, Secretary,UD&PA Department chuan kaihruaiin, Pu H.Lianzela,Director,UD&PA chuan kawlkhawmte hnena lawmthu sawina neiin hun a khar a ni.