3905/2022-2023
Champhai, the 21st March, 2023: Adventist Development and Relief Agency (ADRA) India kaltlanga thenawm ram buai avanga raltlante chhawmdawl dan tur project, 'Protection and Humanitarian Assistance to new arrivals from Myanmar in Mizoram 2023' chungchang ngaihtuahin vawiin chawhma dar 11 khan Champhai District Level Committee on Myanmar Refugees leh ADRA hotute chuan DC Conference Hall-ah inrawnkhawmna hun an nei.

He hun kaihruaitu District Bawrhsap Pu James Lalrinchhana, District Level Committee on Myanmar Refugees Chairman ni bawk chuan thenawm ram buai avanga raltlante chhawmdawl kawngah theihtawp chhuaha tanho a ni chu lawmawm a tih thu a sawi a. Raltlante dawnsawn leh buaipui kawnga NGO, VC, Kohhran, Media, Line Department, Agency hrang hrangte leh mimal inphal tak takte hmalakna chhuanawm a ti a. Mizorama raltlan ngah ber District kan nih avangin tanlak nasat zual kan ngai a, raltlante pawhin India ram dan leh hraite bakah inkaihhruaina siamte tha taka an zawm a tul a ni, a ti a. Raltlante buaipui kawnga inpe tak tak an awm zel chu lawmawm a tih thu sawiin, inhmelhriattawn leh hmalaknate inhriatpawhtawn zel a pawimawh thu te, khawtlang hruaitute leh NGO te nena tanrual thiam a ngaih thu a sawi bawk.

Adventist Development and Relief Agency (ADRA) hi chhiatrupna emaw, emergency thlen thulha tanpui ngaite tanpuia chhawmdawlna pe tura din niin, India-ah chuan Gurgaon, Haryana State-ah hmunpui an nei a, khawvel pumah chuan Maryland, USA ah Hqrs an nei a ni. Kum 1992 ah India ramah bul an tan a, tun dinhmunah hian ram 138 ah inzarpharhin hma an la mek a ni.

Champhai District bikah chuan nikum khan thla thum chhung hma an lak zet hnuah Mizoram chhim lam District 4 ah insawnin hma an la a. Kumin hian hak zauhin hma an lak tawhna District 4 te bakah District thar 2, Champhai leh Aizawl District chhunga raltlante chhawmdawl hna an thawk dawn a; tunhnaia raltlan tharte chu an hmalakna hmasa tura an ruahman a ni a, hemi atan hian thla 12 chhung atan project an siam a ni. Hmalakna tur hrang hrang an tarlan zingah ei tur leh nitin khawsak kawnga mamawh pek te, hriselna lam, drop in centre din, Sikul naupangte mamawh pek, Children Friendly Space siamte leh a dangte a tel a ni.

Meeting-a tarlan a nih dan chuan nimin March ni 20, 2023 thleng khan Champhai District chhunga khua 47 ahte raltlan 10,226 an awm tling tawh a; heng zingah hian puitling mipa 3,033 leh hmeichhia 3,264 bakah naupang 3,929 an awm a ni. Raltlante awmna tura sak Relief Camp 34 a awm mek a; heng zinga 13 te hi kum 2021 a siam niin, nikum 2022 khan 21 sak belh leh a ni. Raltlan zinga 2,643 te Relief Camp-ah chengin, 7,583 te Relief Camp pawn hmun dangah an cheng thung a ni.

Raltlan zawng zawng 10,226 te profiling zawhfel tawh a ni a; heng zinga 9,488 te Temporary ID pek chhuah tawh niin, 738 te tan buaipui mek a ni a. Raltlante pual dan leh hrai inzirtirna Legal Awareness Camp tum 12 buatsaih a ni tawh bawk.

Village Level Committee on Myanmar Refugees-te chu mahni huam chhung theuha raltlan awmte chiang zawka hriaa, inkaihhruaina duante an zawm em tihte ngun tak chîk fo turin District Level Committee on Myanmar Refugees chuan a ngen a. Raltlante chu hriatthiamna avanga awm an nih avangin ram dan leh dun zamte ngaipawimawh fo tur leh dan pela che lo tura beisei an nih thu tarlan a ni a. Raltlan leh khawtual mite inkarah inhriatthiamlohna a awm loh nan leh, inkaihhruaina siamte tha taka zawm a nih theih nan District Level Committee leh Village Level Committee-te tha taka thawhho tlan zel a tul thu tarlan a ni bawk.