3906/2022-2023
Kolasib dated 21st March 2023: Vawiin khan Electric Veng YMA Hall, Kolasibah Mizoram Upa Pawl, Kolasib District Headquarters Assembly vawi 15-na neih a ni a. Khawmpui thuvawn hi 'Mite tan a malsawmna nih' tih niin Pu K.Lalrinliana, Minister, Food, Civil Supplies & Consumer Affairs Department chuan khuallian niin a hmanpui.

Minister Pu K.Lalrinliana chuan Mizoram Upa Pawl din a nih chhoh dan te tarlangin ‘Upa Lengkhawm’ din a nih chhan te ngaihtuahin Mizoram tan a pawl pawimawh tak, naupang zawkte kawng dik a kaihruaitu ni tur a ram leh hnam humhimna leh tihmasawn tur a hmanraw pawimawh tak a nih thu a sawi a. Kum upa zawk ten an tawnhriat atanga thil tha leh hlu tam tak hmang a naupang zawk te an kaihhruai avang hian zo nun ze mawi tlawmngaihna chawi nunna kawngah leh khawtlang nuam siamna kawng ah MUP chu pawl thawhhlawk tak an nih thu a sawi bawk a ni. Kum upa zawk ten an thil tawnhriat atanga hriatna zau zawk an chhar te chu naupang zawk te hnen ah hlanchhawn a nih theih nan ziak a dah that uar zel turin a chah a, MUP member zing ah ram hmasawnna hna thawh kawng a thawh hlawk mi tha hnem tak an awm thu a sawi. Pu K.Lalrinliana chuan a FCS&CA Department chu mipui mamawh eitur chi hrang hrang ngaihtuahtu a nih bak ah Consumer-te dikna chanvo humhalh saktu a nih thu a tarlang a. Consumer kan nih angin mahni chanvo hriatchianna chu kan dikna chanvo humhalhna pawimawh tak a nih thu a sawi bawk a ni.

MUP, Kolasib district Headquarters khawmpui vawi 15-na hi Pu Ralliantawna, President in hun a kaihruai a, pawl hmalakna leh dinhmun tarlanna hun Pu Lianchhunga, Secretary in pein kum 2019 leh 2023 inkar a member boral sunna hun hman a ni bawk. Vawiin khawmpuiah hian Headquarters Executive Committee kalna senso chungchangte, District Headquarters aiawh inruat belh te, Mizo hnam zia leh lam school naupang zirlai subject pakhat a telh chungchangte leh kum upa lamte tan a District Hospital-a OPD counter hran ruahman dan tur chungchangte sawi ho a ni. Secretary tarlan danin MUP, Kolasib District Headquarters hnuai ah hian Area 8 awmin branch 68 an awm a, member mi 5,000 chuang an awm mek bawk a ni.