3907/2022-2023

21.3.2023 : Parliament Session neih mekah Union Minister of Ports, Shipping and Waterways Pu Sarbananda Sonowal chuan Mizoram Rajya Sabha MP Pu K.Vanlalvena zawhna chhangin Assam rama Gharmura lei( bridge) NH 154 atanga intanin Khamrang rama NH 54 bul thlengin KM 87.136 a thui Tlawng lui chu National Waterway No 102 atana puan a nih tawh thu a sawi a. Khamrang leh Sairang inkar Tlawng lui erawh chu tui a thuk tawk loh avangin National Waterway no 102 hian a huam pha lo tih a tarlang.

Pu Vena zawhna dang chhangin Union Minister chuan Tlabung atanga Tuichawng inkar Khawthlang Tupui tihhmasawn nan leh lui mawng tihfai nan cheng vaibelchhe 6.17 pawm a nih tawh thu leh first installment cheng vaibelchhe 1.23 chu pek chhuah a ni tawh tih a sawi bawk a ni.

Bay of Bengal tuifinriat kama Sittwa lawng chawlhhmun atanga Myanmar leh Mizoram inrina thlengin Chhimtuipui lui chu lawng zawh  theiha siam tumna a awm em tih Pu Vena zawhna chhangin Union Minister chuan  Kolkatta atanga KM 539 a thui Sittwa lawng chawlhhmun chu NE state te tan pawha hman tangkai a nih theih nan Mizoram atanga KM 121 a thui Paletwa thleng KMMTTP Road laih mek a ni a. Paletwa atanga Chhimtuipui luimawng lam hi Sittwa thlengin KM 158 a thui niin hei hi Lawng zawh theih a nih thu Minister chuan a sawi a. Hei hian NE state atangin India ram hmun dang panna  tur kawngpui a siam belh dawn a ni a ti bawk.