No.4457/2021-2022
Aizawl, 30th March, 2022 : ATAL MISSION FOR REJUVENATION AND URBAN TRANSFORMATION (AMRUT) 2017-2019 kaltlanga cheng nuai 230.73 senga sak “Chhawnzinga Lui Water Supply Scheme”, Chanmari West, Aizawl-a mi chu Deputy Chief Minister Pu Tawnluia, PHED leh UD&PA Minister ni bawk chuan vawiin khan a hawng.

Chhawnzinga Lui Water Supply Scheme hi Hunthar, Edenthar bakah Chanmari West hmu thenkhat a cheng mihring 4200 vel chawm tura ruahman a ni a, Chhawnzinga Lui (spring source) tuihna put 4 lakkhawm hmanga chawm tur an ni. Chanmari West mawngah Chhawnzinga Lui Pump House sak a ni a, he Pump House atang hian Edenthar Reservoir awm sa tui litre nuai 2 dawng leh AMRUT (2017-19) hnuaia sak Hunthar Reservoir tui litre nuai 1.3 dawngah pump luh a ni. Edenthar Reservoir atang hian pipe GI(M) 80 mm hmangin Edenthar Venga mi 2100 leh Chanmari West-a mi 200 chawm turin pek chhuah a ni a, Hunthar Reservoir atang hian pipe GI(M) 100 mm leh 80 mm hmangin Hunthar Venga mi 1750 leh Chanmari West-a mi 150 chawm turin pek chhuah a ni. Pump House atang hian darker tin tui litre 45,000 pump theih beisei a ni. UD&PA Department chu Nodal Agency niin PHED chu Implementing Agency a ni a, 27.01.2020 khan hna thawh tan a ni a, 30.03.2020 khan thawh zawh a ni.

Chhawnzinga Lui Water Supply Scheme hawnna inkhawm Chhawnzinga Lui Pump House kawta buatsaihah thusawiin khuallian Pu Tawnluia chuan Chhawnzinga Lui chu tunhma chuan tuihna tha leh Aizawl khawpui pawhin an hriat lar, hmun pawimawh tak a ni thin a, mimal thahnemngai intelkhawmin kum 1960 chho khan Aijal Water Company dinin he lui tui hi an khuap a, mipui hnenah an hralh thin a, kan chhawr tangkai em em thin a ni, a ti a. Hunthar Venga Company Peng pawh hi Aijal Water Company hming chawia phuah a ni nghe nghe a ti a. Kum 1970 khan PHED in leiin an enkawl chhunzawm tih a sawi bawk.

Khuallian chuan mipuiten tangkai taka kan chhawr laiin khuarel chhiatna vangin kum 2015 khan hman tlak lovin tihchhiat a ni a, PHED in theihtawp chhuahin hma a la a, ruahmannate siamin a hlawhtlinna kan hmu ta hi a lawmawm a ni, a ti a. Helai ram hi mimal ram/inhmun atan an lo theh hman a, mipuite tan tiin la let turin theihtawp kan chhuah a, hetih kawnga Revenue Department hotuten tan an lakpuina avangin an chungah lawmthu a sawi bawk a ni.

Pu Tawnluia chuan he Water Supply Scheme enkawl him leh a tuihna humhalh hi kan ngaih pawimawh a ngai a, tuihna a tam theih nana humhalh turin jitin kan tanrual a ngai a, Mizorama hmun hrang hranga lui tui kan tlante hnar humhalh a tuihna tih pun hi mi zawng zawngin mawhphurhna a kan l;ak a ngai theuh a ni, a ti bawk.

Pu Tawnluia chuan Aizawl khawpuiin kan tlan hi Phase –I leh Phase-II a awm a, kan khawl neih te a upat tawh avangin pipeline thlengin thawm that a ngai a, sawrkarin theihtawpchhuahin hma a la a, khawl te kan thlak bakah thawm that ngaite kan thawm tha a, hei hian awmzia a nei tannin hmasawnna kan hmu tan a, tunah chuan tui nitin litre maktaduai 28 – 30 kan pump thei tawh a ni, a ti a. Hei hian kan mamawh min la phuhru zo lova, SIPMIU in tunah hian Tlawng lui tui lakna tur khawl an bun mek a, Aizawl Hmar lamin an chhawr tur ruahmanna siamin an thawk mek a ti a, pipe phum hna pawh thla hnih chhunga zawh hman a beisei thu leh kum thar lamah khawl bun hna hi zawh fel beisei a nih thu sawiin ruahman ang chuan nitin tui litre maktaduai 28 vel pump theih a nih tur thu a sawi bawk.

Aizawl Chhim lam veng hmun hniam deuh chawm turin Tawi tlang atang Gravity in tui lakna project thawh mek a n ih thu pawh sawiin nakkumah zawh fel theih beisei a nih thu a sawi bawk a, nitin tui litre maktaduai 15 pek theih beisei a nih thu a sawi bawk.

Tuisemna Distribution Line tihchangtlunna tur Project pawh sawrkar laipuiah bawhzui mek a nih thu pawh sawiin Minister hian Jal Jeevan Mission hnuaiah kum 2023 ral hma a Mizoram thingtlang khawtin tuam chhuah an tum thu leh Central sawrkar pawhin JJM hn uaia Mizoram sawrkar hmalakna an rawn fak thu a sawi bawk a ni.

Khualzahawm, bialtu MLA ni bawk Pu C. Lalmuanpuia pawhin thu sawina hun hmangin Chhawnzinga Lui Water Supply Scheme tharthawh lehna tur Deputy Chief Minister-in theihtawp a chhuahpuina ah lawmthu a sawi a, Hunthar, Edenthar leh Chanmari West Local Council ten tuihna humhalh tura theihtawp an chhuahnaah lawmthu sawiin, PHED chungah lawmthu a sawi bawk a ni.

Chhawnzinga tuikhuah leh a ram hi kum 1938 vel ah hetih lai a Bawrhsap in Pu Chhawnzinga hnenah Fish Pond a tan a pass a pek a ni a. Motor a tui chawi ve theih nan Motor kawng laih laiin Pu Chhawnzinga te thian ho chuan Aijal Water Company an din ta a, Pu Chhawnzinga chuan sum thawh mai tur a neih ve loh avangin pawisa thawh ve aiah helai tuikhuah leh ram hi a thawh ta a, helai ram hi Aijal Water Company hming in pass 29 of 1960 chu District Council in a pe ta a ni.

Kum 1970 khan helai ram hi PHE Department chuan Aizawl Town Emergency Water Supply atan a tangkai dawn em a an hriat avangin Aijal Water Company hnen atang chuan lei dil in, an in berem thei ta a. Hetih lai a Aijal Water Company Manager Pu Chhawnzinga leh SDO PHE Department Pu Clement Lalrema te chuan 30.11.1970 ah hetiang hian inremna an siam ta a ni.

1. Dt. 1.12.1970 to 31.3.1971 Financial Year chhungin Rs. 14,000/- an pe anga, a bak Rs. 72,000/- chu 1.4.1971 to 20.1.1972 Financial Year chhung Union Territory (UT) hma in an pe tla ang.

2. Mizo District Council Aizawl in pass a lo pek tawh leh a panna kawng hi PHE Department in an nei nghal ang a, kawng leh a enkawl zui leh a senso pawh PHE Department kut ah a awm zui ang.

PHE Department chuan Aizawl Town Emergency Water Supply nan tangkai taka a hman reng hnuah Tui Pump khawl te (kuta vai chi) bun thar in Pump House No. II ah pump chho in chuta tang chuan Laipuitlang ah pump chho lehin mipui hnenah tui sem chhuah leh a ni. Greater Aizawl Water Supply Scheme a lo awm tak hnuah chuan khawl lian zawk 67KW (Kirloskar) bun leh in Edenthar tlang Tanky ah pump chhoh a ni a, heta tang hian Edenthar, Chanmari ‘W’ then khat leh Hunthar mipui hnenah tui sem chhuah leh a ni.

Vanduai thlak takin ni 27 August 2015 zing lam dar 3 vel ah tuihawk leh lei tawlh leh leimin nasa tak avangin Chhawnzinga tuikhuah chu hnawh khah vek a lo ni a. Pump House leh Tui pump khawl pawh tui hawkin a chiahin a ti chhe ta vek a, tui pump theih a ni ta lo a ni. Sawrkarin helai hmun hi ngai pawimawhin theihtawp chhuahin tuai thar leh hna a buaipui a, 27th January 2020 ah bul tan tha leh in vawiin hian a hlawhtlinna hmuh a ni ta a ni.