No.4456/2021-2022
Aizawl the 30th March, 2022 : Social Welfare Minister Dr. K. Beichhua chuan vawiin khan Mara rama Missionary (Lakher Pioneer Mission) te hmunhma leh sulhnu te humhalhna tur project, Preservation of Cultural Heritage, Saikao khua a mi kalpui dan turte official te hruaiin a enfiah. He project atan hian Ministry of Tribal Affairs atangin Cheng nuai 560 hmuh a ni.

Saikao khawtlangin an lo hmuahna-ah thu sawiin, Dr. K. Beichhua chuan Tisa leh Thlarau lama malsawmna min thlentu, Sap Missionary te hmunhma leh an sulhnu humhalhna tur project sawrkar laipuiin an lo pawmsak chu Saikao khua leh Mararamin malsawmna kan dawn liau liau a ni. Kum 2020 a Mizoram atanga project an thehluh zingah pahnih chauh Ministry of Tribal Affairs in an lo pawmpui a, chuta pakhat zawk chu a ni, a ti.

Social Welfare Minister Dr K. Beichhua chuan SEDP atanga sorkarin hma a lo lak tawhte tarlangin, SEDP PWD Line Department hnuaiah inkalpawhna kawngpui siamthat hna nasa tak thawh tawh a ni, a ti a. Education Department hnuaiah zirtirtu indaihlohna phuhruk nan SEDP kaltlangin zirtirtu thahnem tak lak a ni tawh bawk a ni tiin, Social Welfare Department kaltlangin SEDP Social Rehabilitation Board chuan ruihhlo ngaite enkawlna tur Sethawnah Jordan Centre siamthat hna pawh thawh zaw tawh a ni thu sawiin, tunah hian ruihhlo ngai enkawl turte admit tan tawh a ni, a ti bawk. SEDP kaltlangin Transport Department chuan Aizawl tih loh District khawpui dangah thalai eizawnna nei lo te tan Two Wheeler Taxi permit pek an tum thu pawh a sawi lang bawk a ni.

Dr K. Beichhua hi Siaha District Bawrhsap Pu Lalsangliana, Pu L. Khaichyu, MDC, Pu Nahlo Solo, MDC te bakah Official leh Party mi thahnem takin an tawiawm.