No.4455/2021-2022
Aizawl 30th March 2022: Vawiin chawhma khan New Multipurpose Hall, Government Kolasib College-ah ni 23, March 2022 ațanga hman țan, College Week kharna hun hman a ni a, Pu K.Lalrinliana, Minister of State, FCS&CA chu khuallian niin 'Blue House' te hnenah pakhatna lawmman a hlan a ni.


Khuallian Pu K.Lalrinliana chuan Govt. Kolasib College-in hmasawnna hmel thar kawng hrang hranga a hmu chu lawmawm a tih thu sawiin tihchangtlun chhunzawm zel a nih theih nan ruahmanna a kal mek thu a sawi a. Khaw dang pan ngai loa Kolasib district chhunga thalaiten anmahni khawtual ngei a zirna an chhunzawm thei chu hlawhtlinna ropui tak a nih thu a sawi. Intodelhna kawng zawh tur a pawimawh hmasa chu hmantlak leh rintlak khawp a thiamthil neih a nih thu Minister chuan sawiin ram leh hnam tan a thil tangkai tur ngaituah chunga College-a an zirnate pawh her rem thiam turin a chah a. Leilung hausakna humhalh zawnga hmasawnna kalpui thiam a tul thu sawiin leilung hausakna haichhuak tur a hma kan lak rualin a buk tawk turin humhalhna kalpui pawh a pawimawh hle a ni, a ti. Pu K.Lalrinliana chuan lehkha zir ngawr ngawr piah lam ah rilru hrisel nan taksa sawizawi a tul thu a sawi a, College Week chu zirlaite zinga thiam thil tha tak tak inphumru haichhuahna hun pawimawh tak a nih thu sawiin infiamnate pawh eizawn nana hmang hlawhtling mi tam tak an awm tawh thu a tarlang bawk a ni.

Pu T.Zahmingliana, Principal, Govt. Kolasib College chuan hrileng kar a College Week felfai tak leh harsatna lian tham awm lova hman a ni chu lawmawm a tih thu sawiin Students' Union-te hmalakna chu fakawm a tih thu a sawi. Vawiin hian inelna hrang hrang hmanga College Week hman zawh tak ah lawmman semna hun hman a ni a, zirlai ațangte in zai leh lamte entir a ni bawk a ni.

Minister Pu K.Lalrinliana hian District Fisheries Development Officer pisa tlawhin Pu F.Vanlallawma, Director hoin Kolasib district chhunga Fisheries Department hmalakna hrang hrang enhona hun an hmang bawk a ni.

Attachment

  • Loading attachment...